Nima uchun Samarqand va Namangan shaharlariga Respublikaga bo‘ysinuvchi shahar maqomi berilmoqda?

Samarqand va Namagan shaharlariga respublikaga bo‘ysinuvchi shahar maqomini berish taklifi prezident tomonidan Oliy Majlis va xalqga qilingan murojaatda berilishini quyidagi omillar bilan asoslash mumkin:

birinchidan, nomi yuqorida aytilgan shaharlarning tarixiy ahamiyatining muhimligidir. Ayniqsa, Samarqand shahri mamlakatimiz tarixida ikkita yirik imperiya poytaxti bo‘lgani (Qoroxoniylar va Amir Temur davlati) uning tarixiy ahamiyatini yanada oshirib, hozirgi kunda ham uning nufuzini oshirishga xizmat qiladi. Samarqand shahrini biz bemalol O‘zbekistonning tarixiy poytaxti deb atay olamiz. Namangan shahri ham tarixda milliy davlatchiligimizning muhim siyosiy va madaniy markazlaridan bo‘lib kelgan;

ikkinchidan, Samarqand va Namangan shaharlarini maqomini o‘zgartirish orqali yaqin istiqbolda ushbu shaharlarni mamlakatimizning yirik iqtisodiy markazlariga aylantirish imkoniyatiga ega bo‘lamiz. Hozirgi izchil iqtisodiy islohotlar davrida hududlarni bir xilda rivojlantirish dolzarb ahamiyatga ega. Bu esa yaratilayotgan moddiy qiymatlarni hududlar o‘rtasida teng muvozanatini ta’minlashga olib keladi;

uchinchidan, Samarqand va Namangan shaharlari mamlakatimizda muhim sosial va demografik ahamiyatga ega markaziy shaharlardir. Aholi soni bo‘yicha Toshkent shahridan keyin turadigan ushbu shaharlarda ijtimoiy va maishiy masalalarga alohida yondashish talab etiladi. Bandlik, ta’lim, sog‘liqni saqlash, kommunal xo‘jalik, xizmat ko‘rsatish tizimini yangi bosqichga olib chiqish bugungi kunning dolzarb masalasidir;

to‘rtinchidan, madaniy jihatdan bu shaharlar o‘zining hunarmandchilik, turizm, milliy qadriyatlarimizni ming yillar davomida ardoqlab kelayotgan markazlar sifatida o‘ziga xos ahamiyat kasb etadi. Qolaversa o‘zbek xalqining o‘tmishdan o‘troq xalq bo‘lganligidan dalolat berib turuvchi ramz sifatida ham qarash mumkin.

Taraqqiy etgan mamlakatlarning tajribasi shuni ko‘rsatmoqdaki, yirik shaharlar tashkil etmasdan va madaniy va iqtisodiy lokomotiv shaharlarsiz iqtisodiy rivojlanish va aholi farovonligiga erishib bo‘lmaydi. Shunday ekan, bir million aholigi ega bo‘lgan shaharlarga alohida ma’muriy hududiy birlik sifatida maqom berish tarixiy zaruriyatdir.