Бева аёлга сиҳатгоҳ йўлланмаси, бемор операциясига 20 млн сўм пул ва отаси хорижда ишлаётган болага байрам совғаси: Мирзаевнинг мигрантлар билан суҳбатида нималар ҳал бўлди?

Тошкент вилояти ҳокими Зоир Мирзаев хорижда меҳнат қилаётган тошкентлик мигрантлар билан суҳбатлашиб, уларнинг муаммосини ўрганди. Бу ҳақда «Дарё»га вилоят ҳокимлиги ахборот хизмати хабар берди.

Маълум қилинишича, ҳоким ва мигрантларнинг онлайн мулоқоти салкам 4 соат давом этган.

Онлайн суҳбатда Россия, Туркия, Миср, Франция сингари мамлакатларда истиқомат қилаётган таълим ва меҳнат мигрантлари иштирок этди. Мулоқот давомида соғлиқни сақлаш, бандлик, моддий-кўмакка доир бир қанча мурожаатлар тингланди ва ечими ҳақида масъулларга топшириқ берилди.Хусусан, Россиянинг Москва вилоятида ишлаб келаётган Нодира Мақсудова турмуш ўртоғининг вафотидан сўнг соғлиги ёмонлашганини айтиб, яшаш жойига яқинда қайтмоқчилигини, сиҳатгоҳга йўлланма олишда кўмак зарурлигини айтди. Мазкур мурожаат вилоят ҳокими ва ўринбосарлари иштирокида муҳокама қилиниб, Нодира опага амалий ёрдам бериладиган бўлди, — дейди вилоят ҳокими матбуот котиби Беҳзод Қобулов.

Вилоят раҳбари мурожаатчига 20 миллион сўм миқдорида моддий ёрдам берилишидан ташқари, унинг фарзандларига Янги йил совғаларини юбориш лозимлигини айтиб, масъулларга бу борада топшириқ берди ва натижани кўришини билдирди. Қолаверса, мурожаатчи Шаҳбоз Икрамовга оиласининг даромадини яхшилаш учун қишлоқ хўжалигида фойдаланиладиган ер майдонидан 50 сотих ажратиладиган бўлди, — дейди ҳокимлик ахборот хизмати ходими Асқар Исмоилов.

Қўшимча қилинишича, вилоят ҳокими мутасаддиларга мулоқот форматини сақлаган ҳолда, қамровни кенгайтириш, иштирокчиларни кенгроқ жалб этиш, мунтазам равишда шундай суҳбатларни ташкил этиб бориш бўйича кўрсатма бериб, жараёнларда бир вақтнинг ўзида YouTube, Telegram, Facebook орқали намойиш этилган жонли эфирлар изоҳларида берилаётган саволларга шахсан жавоб қайтарган.