Qozog‘iston Tashqi ishlar vazirligi mamlakat Rossiyaning Qrimdagi harakatlarini qoralovchi BMT rezolyutsiyasiga nima sababdan qarshi ovoz berganini ma’lum qildi. Bu haqda “Orda.kz” xabar berdi.
TIV rasmiy vakili Aybek Smadiyarov 28-dekabr kuni bo‘lib o‘tgan brifingda mamlakat Ukrainadagi vaziyatni tinch yo‘l bilan hal etish tarafdori ekanini aytdi. Qozog‘iston Ukraina suvereniteti va hududiy yaxlitligini hurmat qilishi va tan olishini ta’kidladi.
“Qozog‘istonning pozitsiyasi izchil va o‘zgarmasdir. 2016-yildan beri biz ushbu rezolyutsiyaga bir xil ovoz berishda davom etmoqdamiz”, — dedi Smadiyarov.
Siyosatchi bu masalani BMT Inson huquqlari kengashi ko‘rib chiqishi kerakligini ta’kidladi. U ko‘p fuqarolar Qozog‘istonning ovoz berish bo‘yicha pozitsiyasini noto‘g‘ri tushunib, janjal ko‘targani, bunda ommaviy axborot vositalari “afsuski, ularni qo‘llab-quvvatlaganini” bildirdi.
“Bizning prinsipial pozitsiyamiz shu: Qrim va Sevastopol shahridagi inson huquqlari bilan bog‘liq vaziyat BMTning maxsus organi, ya’ni BMT Inson huquqlari kengashida ko‘rib chiqilishi kerak. Shu bilan birga, BMT Bosh assambleyasining Inson huquqlari bo‘yicha kengashi to‘g‘risidagi 60/251-sonli rezolyutsiyasiga ko‘ra, Inson huquqlari bo‘yicha kengash haqida asosiy ma’lumotlar xolislik tamoyillariga amal qilishi va siyosiylashtirilishiga yo‘l qo‘ymaslik kerak. Hozirda Qozog‘iston 46 ta davlat qatori BMT Inson huquqlari bo‘yicha komissiyasiga a’zo”, — dedi vazirlik rasmiysi.
BMT Bosh assambleyasi Qrim bo‘yicha yangilangan rezolyutsiyani qabul qildi
BMT Bosh assambleyasi 15-dekabr kuni anneksiya qilingan Qrimda inson huquqlari buzilishiga oid yangilangan rezolyutsiyani qabul qildi. 82 davlat “Vaqtincha bosib olingan Qrim va Ukrainaning Sevastopolidagi inson huquqlari bilan bog‘liq vaziyat” hujjatini qo‘llab-quvvatlash uchun ovoz berdi. 80 ta davlat betaraf qoldi.
O‘n to‘rtta davlat: Belarus, Xitoy, Kuba, Shimoliy Koreya, Eritreya, Efiopiya, Eron, Qozog‘iston, Mali, Nikaragua, Rossiya, Sudan, Suriya va Zimbabve qarshi ovoz berdi. O‘zbekiston ovoz berish jarayonida ishtirok etmagan.
O‘tgan yillarda bosib olingan yarim oroldagi inson huquqlari bilan bog‘liq vaziyat bo‘yicha qabul qilingan shunga o‘xshash rezolyutsiyalarda keltirilgan qoidalarga qo‘shimcha ravishda, ushbu hujjat Rossiyaning Qrimdan Ukrainaga tajovuz qilish maqsadida foydalanish harakatlarini hamda Xerson va Zaporojye viloyatlarini noqonuniy anneksiya qilishga urinishlarni qoralaydi.
Izoh (0)