Россиянинг Перм давлат университетида 2021 йил 20 сентябрда олти кишини отиб ўлдирган Тимур Бекмансуров умрбод қамоқ жазосига ҳукм қилинди. Бу ҳақда «РИА Новости» хабар берди.
Қарор 28 декабрь куни Перм вилоят суди томонидан қабул қилинди. Бекмансуров икки ёки ундан ортиқ одамни ўлдириш ва суиқасд қилиш, ҳуқуқ-тартибот органи ходимининг ҳаётига тажовуз қилиш, бировнинг мулкига қасддан зарар етказиш каби олтита банд бўйича айбдор деб топилди.
Бекмансуров барча моддалар бўйича ўз айбига иқрор бўлди, бироқ суддан тергов билан фаол ҳамкорлик қилгани ва ногиронлиги сабаб, унга нисбатан юқори жазо тайинланмасликни сўради. Ҳибсга олиш вақтида у жароҳат олган, шу сабабли чап оёғи кесилганди.
«Суд Бекмансуровнинг ёшлиги, жазони енгиллаштирувчи ҳолатлари ва ижобий жиҳатларига қарамай, умрбод озодликдан маҳрум қилиш жазосининг дастлабки уч йилини қамоқда, қолган муддатини эса колонияларда ўташи керак деган хулосага келди», — дейди судья.
Шунингдек, айбланувчи ҳалок бўлганлар ва жароҳатланганларнинг оилаларига 18 миллион 300 минг рубль товон пули тўлаши керак.
2021 йилнинг 20 сентябрь куни Тимур Бекмансуров ўзи таҳсил олаётган Перм давлат миллий тадқиқот университети ҳудудида отишма содир этганди. Ҳодиса оқибатида олти киши ҳалок бўлган, 40 дан ортиқ одам жароҳатланган. Ҳибсга олиш вақтида Бекмансуров яраланган, кейинроқ жароҳати оқибатида унинг оёғи кесиб ташланган.
Мавзуга доир
Изоҳ (0)