“Давлат бюджети тақчил бўлса-да, ижтимоий ёъналишларга маблағ ажратишга устувор аҳамият қаратилмоқда” — Сенат раиси 

Ўзбекистон давлат бюджетида бир неча йиллардан бери тақчиллик кузатиб келинади. Дефицит келаси йилда ҳам давом этиши айтилмоқда. Бугун, 27 декабрь куни Сенатда кўриб чиқилган 2023 йил учун мўлжалланган давлат бюджетига оид қонун муҳокамасида ушбу масала тилга олинди.

Фото: Сенат

Парламент юқори палатаси раиси Танзила Норбоева бюджетда тақчиллик кузатилаётгани, аммо шундай ҳолатда ҳам ижтимоий ёъналишларга ажратиладиган маблағлар ҳажми камаймаслигини айтди.

“Давлат бюджетини шакллантиришда ҳар бир масала синчиклаб ўрганилган, ҳар бир банд чуқур таҳлилларга асосланган. Барча муҳим жиҳатлар эътиборга олинган.

Бюджет дефицит (3 фоиз) билан шакллантирилганига қарамасдан, бу гал ҳам ижтимоий ёъналишларга устувор аҳамият қаратилганини эътироф этишимиз керак. Бу ёъналишга қарийб 130 триллион сўм ажратилмоқда, жумладан, таълимга 58,4 триллион сўм, соғлиқни сақлашга 28,4 триллион сўм, ижтимоий нафақа ва ижтимоий таъминотга 33,1 триллион сўм ёъналтирилади. Бу жуда муҳим жиҳат. Ижтимоий соҳа бу, аввало, инсон қадри дегани. Умуман олганда, давлат бюджетини шакллантиришнинг бирорта босқичида ижтимоий харажатларни қисқартириш масаласи кун тартибида бўлмаган. Қайтага халқимиз эҳтиёжларини қондиришга устувор аҳамият қаратилган”, — деди Сенат раиси.

Мажлисда Танзила Норбоева Сенат олиб борган ўрганишларда аниқланган ва айнан бюджет орқали ҳал қилинадиган масалалар давлат бюджетида инобатга олинганини таъкидлади.

“Жорий йилда сенаторларимиз томонидан ҳудудларни ижтимоий-иқтисодий ривожлантириш, аҳолининг ҳақли эътирозларига сабаб бўлаётган масалаларни ўрганиш давомида умумий қиймати 2,5 триллион сўмлик қарийб мингга яқин муаммоли (канализация тармоқларини қуриш ва таъмирлаш, аҳолига тиббий хизмат сифатини ошириш) масала аниқланиб, ҳукуматга киритилган эди. Барча таклифларимиз атрофлича ўрганилиб, уларни ҳал қилиш учун 800 миллиард сўмга яқин маблағ ажратилиши белгиланди ва ушбу маблағлар бугун сиз билан бирга муҳокама қилаётган 2023 йилги давлат бюджетида акс эттирилди”, — деди парламент расмийси.

Аввалроқ Сенат 2023 йилга мўлжалланган давлат бюджетини маъқуллагани хабар қилинганди.