Бирлашган Миллатлар Ташкилоти бош котиби Антониу Гутерриш Украина бўйича музокараларда воситачи бўлиши мумкин. Фақат бунинг учун можаро томонлари рози бўлиши керак, деб хабар берди «ТАСС» БМТ раҳбарининг офисига таяниб.
«Бош котиб илгари ҳам бир неча бор таъкидлаганидек, у воситачи бўлиши мумкин, фақат барча томонлар унинг воситачилик қилишни хоҳласагина », — дейилади баёнотда.
Аввалроқ Украина ташқи ишлар вазири Дмитрий Кулеба Киев 2023 йил февралида Гутерриш воситачилигида БМТда тинчлик саммити ўтказмоқчи эканини айтганди. Кулебанинг сўзларига кўра, бундай саммитни ўтказиш учун БМТ энг яхши платформа бўлиши мумкин, чунки бу маълум бир давлатга хизмат кўрсатишни англатмайди. Бундан ташқари, БМТ Бош котибининг ўзи ҳам ўзини «самарали воситачи ва музокарачи» сифатида кўрсатган.
Айни вақтда АҚШ ва Европа давлатлари Гутерришни «Россия таҳдидларига очиқдан очиқ ён беришда» ва Россиянинг Украинага ҳужум учун чиндан ҳам Эрон дронларидан фойдаланаётганини текшириш бўйича миссия жўнатмаганликда айблаган.
Буюк Британия, Франция, Германия, АҚШ ва Украина Эронда ишлаб чиқарилган учувчисиз учоқларнинг Россияга етказиб берилиши БМТ Хавфсизлик Кенгашининг 2015 йилда қабул қилинган резолюциясини (у Эрон билан ядровий келишувни таъминлашга қаратилган) бузиш эканини даъво қилмоқда. Улар Гутерришнинг Киевга текширув учун расмийлардан иборат гуруҳ юборишини истамоқда.
Изоҳ (0)