Қозоғистон ташқи ишлар вазири Мухтор Тлеуберди мамлакат Россияга қарши санкцияларга қўшилмаслигини маълум қилди. Бу ҳақда Спутник хабар берди.
Сиёсатчи Япониянинг NHK нашрига берган интервьюсида бу ҳақда маълумот берган.
«Россия ва Қозоғистон ўртасида яқин иқтисодий алоқалар мавжуд, шу сабабли Россияга қарши санкциялар Қозоғистон иқтисодиётига салбий таъсир кўрсатмоқда. Шу билан бирга, Қозоғистон иқтисодиёти турли корхоналар томонидан чеклов чораларни четлаб ўтиш учун фойдаланилмайди», — деди Тлеуберди.
Унинг қўшимча қилишича, Остона ҳам Москва, ҳам Киев билан дўстона муносабатларни сақлаб туради.
«Россия ва Украина Қозоғистон учун тарихий дўст давлатлардир. Президент Тўқаев ҳар икки давлат раҳбарлари билан мунтазам мулоқот қилиб, уларни ҳозирги можарога тинч ва дипломатик ечим топиш учун музокаралар столига ўтиришга чақиради», — дейди вазир.
Тлеуберди Қозоғистон ўзининг қўшнилари, шунингдек, Япония, АҚШ, Европа Иттифоқи ва бошқа етакчи давлатлар билан ўзаро муносабатларни ривожлантиришни исташини билдирди.
Қозоғистон ТИВ раҳбари аввал ҳам Россияга нисбатан санкцияларга қўшилиш ва Москва манфаатларига тажовуз қилувчи қадамлар қўйиш ниятида эмаслигини таъкидлаганди.
Изоҳ (0)