Ўзбекистонда етиштирилиб истеъмолга чиқарилаётган маҳсулотларнинг таркиби лаборатория текширувлардан қандай ўтказилади, озиқ-овқат хавфсизлигига қай даражада таъминланган? Бу каби саволларга Ҳайвонлар касалликлари ташхиси ва озиқ-овқат маҳсулотлари хавфсизлиги давлат илмий маркази директори Баҳриддин Тонгёриқов «Дарё» мухбирига берган қисқача интервьюсида айтиб ўтди.
Мутахассиснинг маълум қилишича, марказдаги замонавий жиҳозлар қисқа муддатларда озиқ-овқат маҳсулотларининг таркибидаги антибиотиклар, пестицидлар ва паразитларни аниқлаб беради
«Бугунги кунда дунёда энг катта муаммолардан бир озиқ овқат хавфсизлигидир. Шу боис ҳар бир шахс ўзи истеъмол қилаётган маҳсулотни сифатини билишга ҳақли. Қорамолларни даволанганда албатта уларга антибиотиклардан ёки ўсимликларни ҳимоя қилиш учун пестицидлардан фойдаланилади», — деди Баҳриддин Тонгёриқов.
Марказ раҳбарининг таъкидлашича, озиқ-овқат маҳсулотларни етиштиришда кимёвий моддаларнинг меъёридан ортиқ фойдаланиш организм учун оғир оқибатларга олиб келади.
"Ҳеч кимга сир эмаски, кейинги вақтларда ўсимликлар, полиз экинларини етиштиришда зараркунандаларни йўқ қилиш учун кимёвий воситаларни белгиланган нормадан кўпроқ ишлатиш ҳолатлари бор. Табиийки, бу маҳсулот билан бирга истеъмол қилинган организмга киради ва натижада заҳарланишга олиб келади. Шунингдек, Жаҳон соғлиқни сақлаш ташкилоти маълумотларига кўра, зараркунандаларга қарши курашишда пестицидларни ортиқча қўллаш одамларда онкологик касалликлар келиб чиқишига сабаб бўлиши мумкин», — деди мутахассис.
Аввалроқ Баҳриддин Тонгёриқов сифатли гўштни қандай танлаш бўйича тушунтириш берган эди.
Изоҳ (0)