«Роскосмос» ХКС экипажини қутқариш режасини тузмоқда

Россия космик агентлиги Халқаро коинот станциясига бўш фазо кемасини юбориш имкониятини кўриб чиқмоқда. Бу ҳақда «Phys.org» хабар берди.

Ўтган ҳафта Россиянинг «Союз МС-22» космик кемасида совитувчи суюқлик сизиб чиқиши кузатилди, бу эса кема ишидаги бузилишларга олиб келди. Экспертлар ҳалигача авариянинг аниқ сабабларини  ва унинг эҳтимолий оқибатларини ўрганмоқда, бироқ «Роскосмос» аллақачон ХКСдаги космонавтларни «қутқариш» режасини кўриб чиқмоқда.

«Роскосмос» ва NASA вакиллари маълум қилишича, ушбу авария коинот станцияси фаолиятига ва унинг бортидаги фазогирлар ҳаётига хавф туғдирмайди. Айни вақтда эса ҳодиса оқибатида «Союз» кемаси ичкарисида ҳарорат сезиларли даражада ошгани, бу эса унинг ишдан чиқишига олиб келиши мумкинлиги ҳақида хабарлар пайдо бўлди. Бу кема эса космонавтлар учун транспорт воситаси бўлиб ҳисобланади, хусусан, у сентябрда икки россиялик ва бир америкаликни орбитага олиб чиққан эди. Келаси йил мартида эса бу кема уларни Ерга қайтариб олиб келиши керак.

Россия космик агентлиги вакили Сергей Крикалёвнинг айтишича, фазогирлар Ерга қандай қайтиб келиши юзасидан якуний қарор қабул қилинганича йўқ. Ушбу босқичда иккита вариант кўриб чиқилмоқда: орбитага бошқа «Союз» космик кемаси учирилади — бунинг эҳтимоли катта ёки бўлмаса космонавтлар «жабрланган» кемада уйга қайтади, бу сценарий эса эҳтимолдан узоқроқ.

Айни пайтда ХКСда етти киши бўлиб, станцияга бириктирилган Crew Dragon космик кемаси фақат тўрт космонавтни сиғдира олади. Яъни, агар шошилинч эвакуация зарурати юзага келса, ҳаммани қутқариш иложи бўлмайди. Бу космик кема октябрда икки америкалик, бир япониялик ва бир россияликни ХКСга етказганди.

NASA’дан Жоэл Монталбано маълум қилишича, «Союз» космик кемасига етган зарар сабаби ҳалигача тушунарсиз бўлиб қолмоқда. Айни пайтда учта версия кўриб чиқилмоқда, яъни микрометеорит, космик чиқинди ёки космик кема тизимининг ишдан чиқиши сабаб бўлган бўлиши мумкин.

Шу билан бирга, «Роскосмос» раҳбари Юрий Борисов маълум қилишича, «Союз» бортидаги ҳарорат барқарорлашган ва Цельсий бўйича 30 даражадан ошмаяпти. Бу кемага ХКСнигн Россия сегментидан совуқ ҳаволи қувур уланганидан кейин юз берган.