Италия бош вазири Жоржия Мелони италияликларни Украина билан бирдамлик сифатида ҳар куни бир соатга энергия манбаларини ўчиришга чақирди. Бу ҳақда Reuters хабар бермоқда.
«Украиналиклар нималарни бошидан кечираётганини тушуниш учун барча италияликлардан кунига бир соатга энергия манбаларини ўчиришни сўрайман», — деди Мелони.
Шунингдек, унинг «Италия Биродарлари» партияси «ватанига муҳаббат ва ўз эркинлигини ҳимоя қилаётган» украиналикларга ҳурмат бажо келтирган.
10 октябрдан буён Россия Украина энергетика инфратузилмасига зарбалар бериб келмоқда. 16 декабрь куни Украина ҳукумати Киев, Харьков, Николаев, Днепропатровск ва Тернопол вилоятларидаги портлашлар ҳақида хабар берди. «Укрэнерго» электр энергия тизими оператори фавқулодда вазият ҳақида эълон қилди. Охирги марта зарбалар 19 декабрь куни берилди.
Аввалроқ Украина президенти Владимир Зеленскийнинг рафиқаси Елена Зеленская Украина аҳолисининг катта қисми Евроиттифоққа аъзо бўлиш учун чироқсиз ва иссиқлик таъминотисиз яшашга тайёрлигини айтганди. Унинг қайд этишича, украиналиклар нимани деб сабр қилишни билади ва ўз мамлакати келажагига оптимизм билан қарайди.
Изоҳ (0)