Иқтисодий таҳлилчи Абдулла Абдуқодиров «Дарё» мухбирига берган интервьюсида кучли парламент барпо бўлиши учун халқ ўз номзодларини сайлаши кераклиги ҳақида гапирди.
Абдулла Абдуқодировнинг айтишича, энг муҳим масала халқ номзодларни ўзи танлаши зарурлиги билан боғлиқ.
«Парламентчилик ҳеч қайси мамлакатда бирданига зўр бўлиб кетмаган. Тўғри, бу соҳада ҳам ислоҳотлар амалга ошяпти. Лекин халқимиз парламент аъзоларини сайланишида бефарқ бўлиб туриб, кейин улардан бирор нарсани талаб қилиши ғалати ҳол. Аввал сайловларда фаол қатнашайлик. Ўзимизга мос бўлган ва ўзимиз истаган депутатларни сайлайлик. Кейин улардан талаб қилсак тўғри бўлади. Ҳоким берган битта рўйхат билан депутатларга овоз бериб, ўзимиз парламентни сайлаб қўйганмиз, яна улардан норози бўламиз. Кейинги сайловларда сал бошқачароқ бўлиши керак. Номзодларни ўзимиз танлашимиз лозим. Шунда улардан ишни талаб қилсак тўғрироқ бўлади», — деди у.
Аввалроқ сиёсатшунос Камолиддин Раббимов ҳам парламент қандай бўлиши кераклиги ҳақида гапирганди.
«Парламентнинг иккала палатасида ҳам сиёсий тафаккур шаклланиб бўлган. Бир қанчагина сенатор ва депутатлар вазиятни ижобий томонга ўзгартириб турибди. Кейинги сайловларга ҳам оз қолди. Ва унга алоҳида эътибор бериш керак. Парламент ниҳоятда кучли, профессионал, эркин ва юқори малакали бўлиши лозим», — деган сиёсатшунос.
Изоҳ (0)