Madridning “Real” jamoasi hamon Kilian Mbappeni qo‘lga kiritish istagida.
“Qaymoqranglilar” katta xarajatlar bo‘lishiga qaramasdan transferni amalga oshirishga tayyor, deya xabar beradi La Gazzetta dello Sport. Madridliklar prezidenti Florentino Peres fransiyalik futbolchining “PSJ” bilan tuzgan shartnomasidan qo‘rqmayapti. Mbappe parijliklar safidagi 3 yili uchun 636 million yevro ishlab topadi. Peres ushbu shartlarni takrorlashga ham tayyor.
Transferning umumiy qiymati 1 milliard yevroni tashkil etishi mumkin. Uning ichiga Kilianni parijliklardan sotib olish xarajatlari, maosh va turli bonuslar kiradi.
Mbappe joriy mavsum Liga 1 da 14 ta o‘yinda ishtirok etib, 12 ta gol va 2 ta golli uzatmaga mualliflik qildi.
Kilian 2022-yilning yozida Madrid klubi safiga o‘tishi haqida ko‘plab xabarlar tarqalgan, biroq yakunda futbolchi parijliklar bilan shartnomasini uzaytirgandi.
Izoh (0)