Farg‘ona viloyatining Uchko‘prik tumanidagi xonadonda er-xotin is gazidan vafot etdi. Bu haqda “Daryo”ga Bosh prokuratura matbuot xizmati xabar qildi.
Uchko‘prik tumani IIB navbatchilik qismidan 21-dekabr kuni soat 08:30 larda berilgan xabarga ko‘ra, tumanning, “Chorbog‘” MFY, Yuksalish ko‘chasidagi uyda yashagan 1977-yilda tug‘ilgan Sh.E. va 1995-yilda tug‘ilgan turmush o‘rtog‘i K.E. yashash xonadonida is gazidan zaharlanib, hodisa joyida vafot etgan.
Ko‘zdan kechirish davomida yashash xonadonining yonma-yon joylashgan yotoqxonasi va yuvinish xonasiga qo‘lbola usulda yasalgan, temirdan ishlangan pechka o‘rnatilgani, pechka shlang orqali propan gaz baloniga ulanib, isitish uchun moslangani, hodisa sodir bo‘lgan kuni xonadonda gaz to‘liq yonmasdan, is gazi ajralib chiqqani aniqlangan.
Hozirda mazkur holat yuzasidan tuman prokuraturasi tomonidan tergovga qadar tekshiruv olib borilmoqda.
Eslatib o‘tamiz, 4-dekabr kuni Toshkent viloyatida er-xotin va ularning uch oylik chaqalog‘i, 8-dekabr kuni Xorazmda 1958-yilda tug‘ilgan fuqaro va uning 13 yoshli nevarasi is gazidan vafot etgandi. Namangandagi xonadonda qo‘lbola pech sabab yong‘in yuz berib, ikki kishi — biri 65 foiz, ikkinchisi 95 foiz kuyish jarohati olgandi. 10-dekabr kuni Qashqadaryoda qaynona, kelin va nabira is gazidan vafot etdi, uning ertasiga bir oilaning uch nafar farzandi is gazidan zaharlandi. Ulardan biri vafot etdi, qolgan ikki nafari komaga tushdi. 14-dekabr kuni Qoraqalpog‘istonda to‘rt nafar fuqaro is gazidan zaharlandi.
Izoh (0)