Film yaratishda muhim qarorlar nafaqat prodyuser va rejissorlar tomonidan qabul qilinadi, balki bu jarayonga butun suratga olish guruhi, shu jumladan, aktyorlar ham jalb qilinadi. Misol uchun, aktyorlar o‘z qahramonlarining tashqi ko‘rinishi yoki xulq-atvorida ba’zi o‘zgarishlar qilishlari mumkin, bu esa film muvaffaqiyatini ta’minlaydi. Anjelina Joli “Malefisenta” filmini suratga olish vaqtida aynan shunday qilgan.
Anjelina Joli — “Malefisenta”
Anjelina Jolining o‘zi “Malefisenta” filmidagi qahramoni qo‘rqinchli ko‘rinishi uchun maxsus qoplamalar yordamida burnining shaklini o‘zgartirishni taklif qiladi. Shuningdek, vizajistlar jamoasi ham aktrisaning yonoq suyaklarini yanada bo‘rttirishga qaror qilishadi. Bu g‘oya hammaga ham yoqmaydi, lekin Anjelina aynan shu narsa kerakligini tushunadi. Bundan tashqari, aktrisa ko‘zlarini echkiga o‘xshatib qo‘yadigan linzalarni taqishdan bosh tortmaydi.
Skarlett Yoxansson — “Qora beva”
Qora beva — sirli ayol, Yoxansson bu qahramonga bag‘ishlangan film shunchaki uning shakllanishi tarixi bo‘lishini xohlamaydi. “Obrazim yuzaki bo‘lishini xohlamadim. Men bu filmda suratga tushishga Qora bevaning kimligini yaxshiroq ko‘rsatib berish sharti bilan rozi bo‘ldim”, — deydi u.
Kartinada psixologik travma va og‘riq kabi ko‘plab murakkab savollar tug‘iladi va Yoxanssonning qahramoni — Natasha chinakam kuchli va fidoyi ayol bo‘lib chiqadi. Skarlett uni his-tuyg‘ulari yo‘q superqahramon ayol sifatida emas, balki oddiy odam sifatida ko‘rsatishni xohlaydi. “Superqahramon janrini jiddiyroq qilishda men o‘zimga ishonchsizlik, psixologik komplekslar, sharmandalik va umidsizlik masalalariga to‘xtalishni istadim”, — deydi aktrisa.
Dueyn Jonson — “Rempeyj”
Gorilla haqidagi filmning original ssenariysida Jorj film oxirida mardlarcha o‘lishi kerak edi, ammo Dueyn darhol film oxirini o‘zgartirish kerakligini aytadi. “Kinoning qayg‘uli notada tugashi menga yoqmaydi. Haqiqiy hayotda bundan ham ko‘proq narsa bor. Yakuniy titrlar chiqqanda, faqat ijobiy his-tuyg‘ularni his qilishni xohlayman”.
Ammo rejissor Bred Peyton bunga rozi bo‘lmaydi. “Menimcha, Jorjning o‘limi filmni yanada dramatik qilgan”, — deydi rejissor.
Keyt Blanshett — “Oushenning 8 dugonasi”
Filmda Keyt Blanshett qahramonining ismi Lou, lekin dastlab unga aktrisanikidek Keyt ismi berilishi rejalashtirilgan. Ammo Blanshett bunga mutlaqo qarshi bo‘ladi. U shunday dedi: “Do‘stlar, menimcha, bu unchalik to‘g‘ri emas. Qahramonni mening ismim bilan atay olmaymiz”. Yozuvchilar uning e’tirozlarini asosli deb topishadi. Aktrisa va uning personaji o‘rtasidagi o‘xshashliklarga qaramay, Keyt ulardagi farqlarni ko‘rsatmoqchi edi, shuning uchun ijodkorlar Lou ismini ma’qullashadi.
Deykr Montgomeri — “Juda g‘alati ishlar”
2-mavsumni suratga olish jarayonida Montgomeri serial yaratuvchilari — aka-uka Dafferlarni o‘z qahramoni Billi obrazini chuqurlashtirishga ko‘ndirib, tomoshabinlarga u qattiqqo‘l ota bilan katta bo‘lganligini ko‘rsatadi. 3-mavsumda ssenariyga yangi qahramon — Billining biologik onasi kiritiladi. Natijada tomoshabinlar qahramonni tashlab ketishganida qanchalik og‘riqni boshdan kechirganini bilib olishdi.
“O‘tgan mavsumda Billining onasi otasidan farqli ravishda sahna ortida qolgandi. Lekin men u haqida ko‘proq bilishni xohlardim. Men aka-uka Dafferlariga ushbu personajni kiritishga rozi bo‘lganlari va hattoki bir nechta g‘oyalarimni inobatga olganlari uchun minnatdorlik bildirmoqchiman”, — deydi Montgomeri.
Emma Korrin — “Toj”
Emma Korrinning so‘zlariga ko‘ra, “Toj” serialida u malika Diana kasallangan bulimiya (ruhiy kasallik bo‘lib, unda bemor bilmagan holda ko‘p miqdorda oziq-ovqat iste’mol qiladi) kabi nozik mavzuni ko‘tarmoqchi edi. Filmda Diananing ruhiy holatini ishonchli tarzda yetkazish uchun butun jamoa aktrisaning tana tili ustida ishladi. Aks holda, xuddi shu muammoga duch kelgan odamlar malika timsolini o‘zlari uchun haqoratli deb bilishlari mumkin edi. “Menimcha, biz bunday suhbatlardan qochmasligimiz kerak. Diana hech qachon bulimiya bilan kasallanganini yashirmagan”, — dedi aktrisa.
Mavzuga doir:
- Hammaning og‘zida “Uenzdey”: nima uchun Addamslar oilasining g‘amgin qizi haqidagi serial rekordlarni yangilamoqda?
- Kinotavsiya: og‘ir damlarda dardingizga malham bo‘lishi mumkin bo‘lgan ajoyib filmlar
- Aktyorlar tomonidan improvizatsiya qilingan va kartinaning kult sahnasiga aylangan mashhur filmlardagi kadrlar (video)
Izoh (0)