Ekologik partiya markaziy kengashining 19-dekabrdagi navbatdagi plenumida partiya markaziy kengashi ijroiya qo‘mitasi raisligiga Hamzayev Abdushukur Xudoyqulovich nomzodi saylandi. Bu haqda Qonunchilik palatasi spikeri o‘rinbosari Odiljon Tojiyev xabar berdi.
Hamzayev 1973-yilda Surxondaryo viloyati Uzun tumanida tug‘ilgan. 1995-yil Samarqand qishloq xo‘jalik institutini, 2013-yil Davlat boshqaruvi akademiyasini tamomlagan, mutaxassisligi — agronom olim. Qishloq xo‘jalik fanlari doktori, professor.
Uzoq yillar ekologiya va atrof-muhitni muhofaza qilish masalalari bilan shug‘ullanib, ilmiy-pedagogik, rahbarlik tajribasiga ega. 2022-yil iyun oyidan buyon Ekologik partiya markaziy kengashi ijroiya qo‘mitasi raisi o‘rinbosari lavozimida ishlab kelgan.
17 ta qishloq xo‘jalik ekin navlari va 16 ta ixtiro patenti muallifi, uning 270 dan ziyod ilmiy ishlari chop etilgan. Shuningdek, ekologiya, qishloq va o‘rmon xo‘jaligi sohasida Xitoy, Yaponiya, Koreya, Isroil, Turkiya, Germaniya, Bolgariya kabi davlatlarda malaka oshirgan.
Izoh (0)