Rossiyalik oligarxlar Rossiyaning Ukrainaga hujumi munosabati bilan joriy etilgan Yevropa Ittifoqi sanksiyalariga qarshi Inson huquqlari bo‘yicha Yevropa sudiga 61 ta da’vo arizasi bilan murojaat qildi. Bu haqda Bild xabar berdi.
Da’vo arizasi bilan chiqqanlar orasida Angliyaning “Chelsi” futbol klubi sobiq xo‘jayini, sanksiyalarga tushgan rossiyalik oligarx Roman Abramovich, Grigoriy Beryozkin va Gennadiy Timchenko bor. Da’vogarlar boshqa narsalar qatorida sanksiyalar tufayli ularga yetkazilgan “ma’naviy zarar”ni qoplashni talab qilmoqda.
Xususan Berezkin obro‘siga jiddiy zarar yetkazilganini aytib, “u bilan Rossiyaning Ukrainaga nisbatan siyosati o‘rtasida hech qanday bog‘liqlik yo‘qligini” ilgari surgan. Oligarx Rossiya hukumatini qo‘llab-quvvatlamasligini va “ma’naviy zarar” uchun kompensatsiya sifatida bir million yevro so‘ragan.
Shveysariyada yashovchi yana bir oligarx Timchenko YIni Rossiya prezidenti Vladimir Putin bilan munosabatlarini “baholashda xatolik”da ayblab, 1 million yevro ekvivalentida sudga bermoqchi.
Shuningdek, sud orqali zararni qoplashga harakat qilayotgan taniqli rus oligarxlari orasida Alfa-guruh moliyaviy asoschisi Mixail Fridman ham bor.
Rossiyalik oligarx Alisher Usmonov ham Yevropa Ittifoqining sanksiyalar ro‘yxatiga kiritilganiga norozilik bildirib, Yevropa sudiga da’vo arizasi bilan murojaat qilgandi.
“Janob Alisher Usmonovning Yevropa Ittifoqi kengashiga qarshi da’vosi 29-aprel kuni qo‘zg‘atilgan. Da’vogar kengashning unga nisbatan cheklov choralarini qo‘llash to‘g‘risidagi qarorini bekor qilishni va sud qarori chiqarilgunga qadar taqiqlovchi choralarni qo‘llashni to‘xtatib turishni talab qilmoqda”, degan sud matbuot xizmati.
Biroq, Yevropa sudi Usmonovning Yevropa Ittifoqi sanksiyalari ro‘yxatiga kiritilganiga norozilik bildirgan da’vosini ko‘rib chiqish so‘rovini rad etgan. Alisher Usmonov sanksiyalarni bekor qilishdan tashqari Yevropa Ittifoqidan 20 ming dollar miqdoridagi sud xarajatlarini to‘lashni talab qilgan. Sud oligarxning bu talabini ham qoniqtirmagan.
Izoh (0)