Россиялик олигархлар Россиянинг Украинага ҳужуми муносабати билан жорий этилган Европа Иттифоқи санкцияларига қарши Инсон ҳуқуқлари бўйича Европа судига 61 та даъво аризаси билан мурожаат қилди. Бу ҳақда Bild хабар берди.
Даъво аризаси билан чиққанлар орасида Англиянинг «Челси» футбол клуби собиқ хўжайини, санкцияларга тушган россиялик олигарх Роман Абрамович, Григорий Берёзкин ва Геннадий Тимченко бор. Даъвогарлар бошқа нарсалар қаторида санкциялар туфайли уларга етказилган «маънавий зарар»ни қоплашни талаб қилмоқда.
Хусусан Березкин обрўсига жиддий зарар етказилганини айтиб, «у билан Россиянинг Украинага нисбатан сиёсати ўртасида ҳеч қандай боғлиқлик йўқлигини» илгари сурган. Олигарх Россия ҳукуматини қўллаб-қувватламаслигини ва «маънавий зарар» учун компенсация сифатида бир миллион евро сўраган.
Швейцарияда яшовчи яна бир олигарх Тимченко ЕИни Россия президенти Владимир Путин билан муносабатларини «баҳолашда хатолик»да айблаб, 1 миллион евро эквивалентида судга бермоқчи.
Шунингдек, суд орқали зарарни қоплашга ҳаракат қилаётган таниқли рус олигархлари орасида Алфа-гуруҳ молиявий асосчиси Михаил Фридман ҳам бор.
Россиялик олигарх Алишер Усмонов ҳам Европа Иттифоқининг санкциялар рўйхатига киритилганига норозилик билдириб, Европа судига даъво аризаси билан мурожаат қилганди.
«Жаноб Алишер Усмоновнинг Европа Иттифоқи кенгашига қарши даъвоси 29 апрель куни қўзғатилган. Даъвогар кенгашнинг унга нисбатан чеклов чораларини қўллаш тўғрисидаги қарорини бекор қилишни ва суд қарори чиқарилгунга қадар тақиқловчи чораларни қўллашни тўхтатиб туришни талаб қилмоқда», деган суд матбуот хизмати.
Бироқ, Европа суди Усмоновнинг Европа Иттифоқи санкциялари рўйхатига киритилганига норозилик билдирган даъвосини кўриб чиқиш сўровини рад этган. Алишер Усмонов санкцияларни бекор қилишдан ташқари Европа Иттифоқидан 20 минг доллар миқдоридаги суд харажатларини тўлашни талаб қилган. Суд олигархнинг бу талабини ҳам қониқтирмаган.
Изоҳ (0)