Ukraina prezidenti Vladimir Zelenskiy unga Rossiya prezidenti Vladimir Putin bilan muzokaralar o‘tkazishni taklif qilishayotganini aytdi. Zelenskiyning fikricha, “narsalarga nisbatan qarashlar” har xil bo‘lgani sababli, ular muhokama qiladigan hech qanday mavzu yo‘q.
“Bilaman, ba’zilar u bilan muzokaralar stoliga o‘tirishni taklif qilmoqda, lekin u bilan nimani muhokama qilishni bilmayman. U o‘z nuqtayi nazariga to‘g‘ri keladigan tinchlikni xohlayapti, lekin bizning qarashlarimiz mutlaqo boshqa-boshqa”, — dedi Zelenskiy Fransiyaning LCI telekanaliga.
Shuningdek, u Fransiyaning muzokaralarda vositachilik qilish istagini ham izohladi. Ukraina prezidenti fikricha, Fransiya prezidenti Emmanuel Makronning Vladimir Putin bilan muzokaralari natija bermaydi.
Rossiya-Ukraina muzokaralari may oyida to‘xtatib qo‘yilgandi. Moskva so‘nggi vaqtlarda muloqotga tayyorligini muntazam tasdiqlab kelmoqda. Biroq Rossiya Donetsk va Lugansk xalq respublikalari hamda Zaporojye va Xerson viloyatlarini qo‘shib olgach, Zelenskiy Rossiya prezident Putin bo‘lib qolar ekan, u bilan muzokaralar olib borish imkoniyatidan voz kechdi. Keyinroq u bir qator shartlar bajarilgan taqdirda muloqot olib borilishi mumkinligini aytdi.
Izoh (0)