«Дарё» интернет-нашри Тошкент шаҳри ҳокимлиги қошидаги Жамоатчилик кенгаши билан биргаликда «Маҳалла. Муаммо. Мулоҳаза» лойиҳасини тақдим этиб келмоқда. Лойиҳанинг 11-сони мавзуси «Тазйиқ ва зўравонлик — номардлик» бўлиб, дастур меҳмони сифатида иқтисод фанлари доктори, профессор Барногул Санакулова таклиф этилди.
Профессор орзудаги уникал тизим – маҳалла мавзусига тўхталар экан, ўзининг мисолида маҳалла раиси қандай тартибда ишлаши кераклиги борасида таклифлари билан бўлишди.
Ижтимоий ҳимоя оладиганлар қанча кам бўлса, маҳаллага шунча яхши. Чунки шунда унинг бюджети бошқа яхши ишларга сарфлаш учун тайёр туради. Асосий маблағ ижтимоий, моддий ёрдам кўрсатиш эмас, ободонлаштириш, қурилиш, «Яшил макон» сингари ислоҳотларга йўналтирилади. Масалан, «Яшил макон» билан 2030 йилгача борамиз, экологик вазият долзарб тусга кирган. Бугун бир марталик гуллар экиш эмас, уйлар орасида кичик-кичик боғлар яратишга эҳтиёж юқори.Агар маҳалла раиси бўлганимда, шу ернинг ўзида яшовчи боғдорчилик, ершуносликдан хабари бўлган одамлардан кичик гуруҳ тузиб, уларни маълум муддат ўқитиб, малакасини оширардим. Натижада «Яшил макон» лойиҳасида айрим ҳокимларга тегишли сохта МЧЖлар эмас, мана шундай боғбонлар гуруҳига буюртма берардим. Тасаввур қилинг, ўзи яшаётган маҳалладаги боғни сидқидилдан парваришлаган йигит меҳнати учун пул ҳам олади.
2030 йилгача ушбу лойиҳага давлат бюджетидан, турли ташкилотлардан ажратилган 7 йиллик маблағ тайёр, фақат ундан самарали фойдаланилса, бас. Шу маҳалла одами ўзи яшайдиган ҳудудда ишласа, тозалигига ҳам эътиборли бўлади, биров ифлос қилиб кетишига йўл қўймайди, ходимларнинг меҳнатини ҳам қадрлайди.Энг муҳими, ишда камчилик ва хатолар бўлса, жамиятнинг бефарқ бўлмаган бирор фуқароси қайси боғбонни бориб «бўғиш»ни, айбдорни қаердан топишни билади.
Кўз кўзга тушиши, андиша сингари қадриятлар ҳам бу жиҳатдан яхши таъсир кўрсатади. Шундагина, ҳақиқатан, биз орзу қиладиган маҳалла шаклланади, коррупциядан холи тизимга эга бўламиз.
Маҳалла раиси ноқонуний ишласа, талабларимизга жавоб беролмаса, уни тўнтариб ташлаб, ўрнига арзирли, муносиб бир йигит ёки қизни қўямиз ва у ўз маҳалласи олдида ҳар йиллик даромад ва харажатлари бўйича ҳисоб беради. Аслида ечим шундай оддий ва содда, – дейди иқтисодчи.
Кўрсатувни тўлиқ тарзда «Дарё»нинг YouTube’даги саҳифаси орқали томоша қилиш мумкин.
Изоҳ (0)