АҚШ президенти маъмурияти Россияни Бирлашган Миллатлар Ташкилоти Хавфсизлик кенгашидан чиқариб ташлаш керак, деб ҳисоблайди, аммо ташкилот қоидалари бунга йўл қўймайди, деди Оқ уй матбуот котиби Карин Жан-Пьер.
«Россиянинг Украинадаги ҳаракатлари БМТ Низомини бузиш ва Хавфсизлик Кенгаши мандатини ҳақорат қилишдир. Биз Хавфсизлик Кенгашининг доимий аъзоси ташкилот низомини бузаётгани ва Украинада бундай шафқатсиз уруш олиб бораётганидан, хусусан, Россия инсонлар азоб-қубатини ошириш мақсадида мамлакатнинг муҳим инфратузилмасини йўқ қилишга интилаётганидан ғазабдамиз. Агар Россияни БМТ Хавфсизлик Кенгашидан чиқариб ташлашнинг бирор усули бўлса, биз бунга дарҳол киришардик», — деди матбуот котиби журналистлар учун брифингда.
Карине Жан-Пьернинг сўзларига кўра, БМТ қоидалари Россияни Хавфсизлик Кенгашидан четлаштиришга йўл қўймаслиги боис, АҚШ барча халқаро платформаларда уни яккалашга, шунингдек, санкциялар ва мажбурлов чоралари ёрдамида жавобгарликка тортишга уринишда давом этади.
«Россия — тажовузкор давлат. Буни унутмаслигимиз керак. Бу урушни айнан Россия бошлаган», — дея хулоса қилди матбуот котиби. Унинг қўшимча қилишича, АҚШ Россия билан урушмаган ва ҳозир ҳам урушаётгани йўқ, фақат АҚШ президенти Жо Байден бир йил аввал Россия президенти Владимир Путинга берган ваъдасини бажармоқда: у агар Россия Украинага ҳужум қилса, АҚШ украиналикларга ўзини ҳимоя қилишга ёрдам беришини айтганди.
«Қўшма Штатлар Украинани қанча керак бўлса, шунча вақт қўллаб-қувватлайди», — деди Жан-Пьер.
Россия Ташқи ишлар вазирлигининг расмий вакили Мария Захарова Оқ уй матбуот котибининг сўзларига изоҳ берар экан, ўзининг Telegram-каналида «Агар Россияни йўқ қилишнинг йўли бўлса, улар дарҳол буни амалга оширишга киришарди», деб ёзди.
14 декабрь куни АҚШ Вакиллар палатасининг икки аъзоси Стив Коэн ва Жо Уилсон АҚШ президентини Россияни БМТ Хавфсизлик Кенгашидан чиқариб ташлаш жараёнини бошлашга чақирувчи резолюцияни тақдим этди. Ҳужжат муаллифларининг таъкидлашича, Россия БМТ Низомини «қўпол равишда бузди», жумладан, Украина ҳудудларини ноқонуний аннексия қилиб, тинч аҳолига қарши жиноятлар ва ядровий таҳдидларга йўл қўйди, бу эса, ўз навбатида, Россиянинг Хавфсизлик Кенгашидаги доимий аъзолик ҳуқуқини шубҳа остига қўяди.
2022 йилнинг апрель ойида БМТ Бош Ассамблеяси Россияни Инсон ҳуқуқлари бўйича кенгаш таркибидан чиқариш учун овоз берганди. Овоз бериш Бучада тинч аҳоли ўлдирилгани маълум бўлганидан кейин АҚШ ва Буюк Британия ташаббуси билан бошланган. Ўз навбатида, Россия кенгашдаги ваколатларини муддатидан олдин тугатаётганини эълон қилди, шунингдек, Бош Ассамблея резолюциясини «ноқонуний ва сиёсий мотивли қадам» деб атади.
Изоҳ (0)