“O‘zbekneftgaz” AJ tomonidan Respublika aholisi va iqtisodiyot tarmoqlariga tabiiy gaz yetkazib berish bo‘yicha tezkor chora-tadbirlar olib borilmoqda.
“O‘zbekneftgaz” AJ Boshqaruvi raisi Mehriddin Abdullayev boshchiligida konlar va ishlab chiqarish obyektlarida havoning keskin sovib ketishi oqibatida yuzaga kelgan qiyinchiliklarga qaramasdan yangi quduqlarni burg‘ilash, mavjud quduqlarni kapital ta’mirlash, shuningdek texnologik obyektlarni ishga tushirish bo‘yicha tezkor tadbirlar amalga oshirilmoqda.
Ushbu maqsadlarda 2022-yilning 1-14-dekabr kunlari “O‘zbekneftgaz” AJ tomonidan 4 ta yangi quduqlar burg‘ulash ishlaridan va yana 1 ta quduq mukammal ta’mirlashdan ishga tushirilishi natijasida kunlik gaz qazib chiqarish 1,3 mln.kub metrga oshirildi.
Jumladan, Muborak regionidagi “Yangi Alat” konidagi 2 va 3-sonli quduqlarni ishga tushirish natijasida kunlik 600 ming kub metr, Ustyurt regionidagi “Quyi Sharqiy Berdax” konidagi 4, 10 hamda “Quyi Surgil” konidagi 21-sonli quduqlarni ishga qo‘shish natijasida esa kunlik 700 ming kub metr hajmda tabiiy gaz qazib chiqarishga erishildi.
Ma’lumot uchun, 2022-yilda yangi ochilgan “Yangi Alat” koni Buxoro viloyatining Olot tumanida joylashgan. Ushbu koni Respublika mustaqilligining 31 yillik bayrami arafasida ochilgan. “Quyi Sharqiy Berdax” va “Quyi Surgil” konlari 2021-yilda ochilgan va Qoraqalpog‘iston Respublikasining Mo‘ynoq tumanida joylashgan.
“O‘zbekneftgaz” AJ matbuot xizmati
Izoh (0)