Toshkentda elektr uzatish tarmog‘ida yuklama ortib ketishi natijasida yong‘in chiqdi

Toshkentning Yakkasaroy tumanida elektr uzatish simlarida kichik yong‘in sodir bo‘ldi. Holat aks etgan video ijtimoiy tarmoqlarda tarqaldi.

“Hududiy elektr tarmoqlari” matbuot xizmatining ma’lum qilishicha, 15-dekabr kuni Muqimiy ko‘chasidagi aholi yashash xonadonlarini elektr energiyasi bilan ta’minlovchi havo elektr uzatish tarmog‘ida yuklamaning ortib ketishi natijasida simlarning qisqa tutashuvida kichik yong‘in sodir bo‘lgan.

Ayni vaqtda Yakkasaroy TETKning tezkor guruh ishchi-xodimlari tomonidan avariyani tezkorlik bilan bartaraf etish uchun barcha zarur choralar ko‘rilib, hududlarda tezkor chiqish brigadalari tomonidan ta’mirlash ishlari olib borilib, avariya holati bartaraf etilmoqda.

Xabarda ta’kidlanishicha, respublika bo‘ylab havo haroratining keskin sovib ketishi natijasida gaz bosimining  pasayib ketishi natijada elektr energiyasiga bo‘lgan talab ortib, joylardagi mavjud past kuchlanishli elektr uzatish tarmoqlarida avariyali uzilish holatlari yuzaga kelmoqda.