O‘zbekiston AOKA tomonidan Axborot kodeksi loyihasi ishlab chiqilib, jamoatchilik muhokamasi uchun e’lon qilindi.
Ushbu kodeks 131 ta moddadan iborat bo‘lib, axborotlashtirish, axborot resurslari va axborot tizimlaridan foydalanish, axborotni erkin va moneliksiz izlash, olish, tadqiq etish, uzatish hamda tarqatishga doir konstitutsiyaviy huquqni amalga oshirish jarayonida yuzaga keladigan, shuningdek axborotning muhofaza qilinishini hamda shaxs, jamiyat vadavlatning axborot borasidagi xavfsizligini, huquqiy axborotni tarqatish va undan foydalanishni ta’minlash sohasidagi munosabatlarni tartibga soladi.
Kodeksda bir qator tushunchalarga, xususan, blogerlarga ta’rif berilgan.
Unga ko‘ra, bloger — Internet jahon axborot tarmog‘idagi o‘z veb-saytiga va (yoki) veb-sayt sahifasiga hamma erkin foydalanishi mumkin bo‘lgan, ijtimoiy-siyosiy, ijtimoiy-iqtisodiy va boshqa xususiyatga ega axborotni joylashtiruvchi, shu jumladan axborotdan foydalanuvchilar tomonidan ushbu axborotni muhokama qilish uchun joylashtiruvchi jismoniy shaxs.
Veb-saytning va (yoki) veb-sayt sahifasining yoxud boshqa axborot resursining egasi, shu jumladan bloger hamma erkin foydalanishi mumkin bo‘lgan axborot joylashtiriladigan Internet jahon axborot tarmog‘idagi o‘z veb-saytidan va (yoki) veb-sayt sahifasidan yoxud boshqa axborot resursidan:
- O‘zbekistonning mavjud konstitutsiyaviy tuzumini, hududiy yaxlitligini zo‘rlik bilan o‘zgartirishga da’vat etish;
- ommaviy tartibsizliklarga, fuqarolarga nisbatan zo‘ravonlik qilishga, shuningdek belgilangan tartibni buzgan holda o‘tkaziladigan yig‘ilishlar, mitinglarda, ko‘cha yurishlarida va namoyishlarda ishtirok etishga da’vat qilish, shuningdek mazkur noqonuniy harakatlarni muvofiqlashtirish;
- jamoat tartibiga yoki xavfsizligiga tahdid soluvchi yolg‘on axborot tarqatish;
- urush, zo‘ravonlik va terrorizmni, shuningdek diniy ekstremizm, separatizm va fundamentalizm g‘oyalarini targ‘ib qilish;
- davlat sirlarini yoki qonun bilan qo‘riqlanadigan boshqa sirni tashkil etuvchi ma’lumotlarni oshkor etish;
- milliy, irqiy, etnik yoki diniy adovat qo‘zg‘atuvchi, shuningdek fuqarolarning sha’ni va qadr-qimmatiga yoki ishchanlik obro‘siga putur yetkazuvchi, ularning shaxsiy hayotiga aralashishga yo‘l qo‘yuvchi axborotni tarqatish;
- jamiyatga, davlatga, davlat ramzlariga hurmatsizlikni namoyon etuvchi, shu jumladan beodoblik bilan ifodalangan axborotni tarqatish;
- giyohvandlik vositalarini, psixotrop moddalarni va prekursorlarni targ‘ib qilish;
- pornografiyani, zo‘ravonlikni va shafqatsizlik, bir jinslilar o‘rtasidagi g‘ayritabiiy aloqalarni targ‘ib qilish, shuningdek o‘z joniga qasd qilishga da’vat etish;
- fuqarolarni, shu jumladan voyaga yetmagan shaxslarni ularning hayotiga va (yoki) sog‘lig‘iga yoxud o‘zga shaxslarning hayotiga va (yoki) sog‘lig‘iga tahdid soluvchi g‘ayrihuquqiy harakatlarni sodir etishga undashga yoki boshqa tarzda jalb qilishga qaratilgan axborotni tarqatish;
- qonunga muvofiq jinoiy va boshqa javobgarlikka sabab bo‘ladigan o‘zga harakatlarni sodir etish maqsadlarida foydalanilishiga yo‘l qo‘ymasligi shart.
Bu talab veb-sayt sahifasi yoxud boshqa axborot resursining egasi, shu jumladan bloger tomonidan bajarilmagan taqdirda mazkur veb-saytdan va (yoki) veb-sayt sahifasidan yoxud boshqa axborot resursidan foydalanish Vazirlar Mahkamasi belgilagan tartibda cheklanishi mumkin.
Kodeks loyihasida belgilanishicha, O‘zbekistonda OAVlarni senzura qilishga yo‘l qo‘yilmaydi.
Davlat organlari, mulkchilik va tashkiliy-huquqiy shaklidan qat’iy nazar boshqa tashkilotlar, mansabdor shaxslar tomonidan OAV mahsulotlari, xabarlar va materiallari yoki ularning qismlarini tarqatishni cheklash, taqiqlash, shu jumladan xabarlar va materiallar matnini o‘zgartirish maqsadida OAV bilan oldindan kelishish (mansabdor shaxsning o‘zi muallif bo‘lgan material va uning intervyusidan tashqari) yoxud OAVni o‘z talabini bajarishga majburlash taqiqlanadi.
Tasdiqlanishi kutilayotgan Axborot kodeksi 10 ga yaqin hujjatning jamlanmasi bo‘lib, u qabul qilingach, davlat boshqaruvi organlari ushbu kodeksga zid bo‘lgan normativ-huquqiy hujjatlarini qayta ko‘rib chiqishi va bekor qilishi lozim.
Hujjat loyihasi muhokamasi 29-dekabrga qadar davom etadi.
Izoh (0)