АҚШ президенти Жо Байден маъмурияти Украинага Patriot зенит-ракета мажмуаларини юборишга тайёргарлик жараёнини якунламоқда, ушбу мажмуа жўнатилиши ҳақида шу ҳафта эълон қилиниши мумкин, деб хабар беради CNN ўз манбаларига таяниб. Ноябрь охирида Пентагон Украинага бу тизимларни етказиб беришни режалаштирмаётганини маълум қилганди.
Patriot зенит-ракета мажмуаси юборилишини Пентагон раҳбари Ллойд Остин маъқуллаши керак, шундан кейин эса қарор Байден томонидан тасдиқланади. Телеканал манбаларига кўра, айни пайтда қарорнинг мудофаа вазири томонидан маъқулланиши кутилмоқда.
Киев Ғарб мамлакатларидан Patriot мажмуасини етказиб беришни кўп марта сўраган, уни АҚШ ва иттифоқдошлари ҳаво ҳужумига қарши мудофаанинг универсал воситаси сифатида қўллайди. Украина ташқи ишалр вазири Дмитрий Кулеба бу тизимлар Украина муҳим инфратузилмасини ҳимоя қила олишини айтганди.
CNN қайд этишича, нечта пуск қурилмаси етказиб берилиши ҳозирча номаълум. Оддий Patriot батареяси таркибига нишонларни аниқлайдиган ва кузатадиган радар, компьютерлар, энергетика ускунаси, бошқарув станцияси ва саккизтагача пуск қурилмаси киради, уларда эса учиришга тайёр тўртта ракета бўлади.
Patriot зенит-ракета мажмуасини юборишга келишиб олинган тақдирда, улар энг қисқа муддатда етказиб берилади, украиналиклар эса АҚШнинг Германиядаги базасида (Графенвёрдаги) улардан фойдаланишга ўргатилади.
Мажмуаларни етказиб бериш ва ишлатиш билан боғлиқ муаммолар «улкан», дейди телеканал. Patriot ракета батареяларини тайёрлаш учун одатда бир неча ой кетади, уларни бошқариш учун эса ўнлаб одам керак бўлади, дейилади мақолада. Америка маъмурияти вакили айтиб беришича, сўнгги вақтларда юзага келган вазият Оқ уйни Украинага Patriot тизимини юбориш ҳақида қарор қабул қилишга ундаган.
Сўнгги йилларда АҚШ Patriot’ларни «Эрон ва унинг гумашталари томонидан хавфларга қарши туриш» учун Саудия Арабистони ва Ироққа, шунингдек, Шимолий Кореяни тийиб туриш учун Тинч океани минтақасига етказиб берган эди. Ҳаммаси бўлиб ушбу тизимни АҚШнинг ўндан ортиқ иттифоқчилари, шу жумладан, Германия, Япония ва Исроил ҳам сотиб олган.
Изоҳ (0)