O‘zbekistonda yil boshidan beri bojxona to‘lovlari bo‘yicha tushumlar va tovarlar eksporti hajmi qanday o‘zgargani tahlil qilindi. Bu haqda “Daryo”ga Iqtisodiy tadqiqotlar va islohotlar markazi xabar bermoqda.
2022-yilning yanvar—noyabr oylarida bojxona to‘lovlari bo‘yicha tushumlar 2021-yilning shu davriga nisbatan 38,6 foizga oshdi.
Bojxona tushumlarining eng katta o‘sishi Andijon (60,7 foiz), Jizzax (55,1 foiz), Sirdaryo (46,7 foiz), Farg‘ona (41 foiz) viloyatlarida, Qoraqalpog‘iston (41,3 foiz) va Toshkent shahrida (42,9 foiz) kuzatildi.
Umuman olganda, bojxona to‘lovlaridan tushadigan daromadlarning oshishiga 2022-yil yanvar—noyabr oylarida import hajmining o‘tgan yilning shu davriga nisbatan 19,7 foizga o‘sishi ta’sir ko‘rsatgan asosiy omil bo‘ldi.
Davlat bojxona qo‘mitasi ma’lumotlariga ko‘ra, joriy yil boshidan 30-noyabrga qadar tovarlar eksporti hajmi o‘tgan yilning shu davriga nisbatan 20,4 foizga oshgan.
Eksportning sezilarli o‘sishi Sirdaryo (40,4 foiz), Andijon (38,5 foiz), Navoiy (27,1 foiz), Namangan (25,9 foiz), Samarqand (25,6 foiz) viloyatlarida va Toshkent (40,5 foiz) shahrida kuzatildi.
O‘zbekiston eksportining o‘sishi sanoat mahsulotlari, oziq-ovqat mahsulotlari, kimyoviy moddalar va qishloq xo‘jaligi mahsulotlari eksportining o‘sish sur’atlari oshgani bilan izohlanadi.
Eksportning kamayishi Surxondaryo (-21 foiz), Buxoro (-3,4 foiz), Jizzax (-2,9 foiz) viloyatlarida va Qoraqalpog‘istonda (-12 foiz) kuzatildi.
Avvalroq yil boshidan beri O‘zbekistonda soliq tushumlari qanday o‘zgargani tahlil qilingandi.
Izoh (0)