2022-yilda Amerika iqtisodiyotining o‘sish sur’ati Xitoy iqtisodiyoti dinamikasidan oshib ketishi mumkin. Bu haqda mustaqil ekspertlar prognozlariga tayanib, AQSH prezidenti Jo Bayden Twitter’da ma’lum qildi.
Bu 1976-yildan beri sodir bo‘lmagan hodisa, — deb yozgan Bayden.
Bayden ma’lumotlar manbasiga aniqlik kiritmadi, biroq Bloomberg tahlilchilari may oyida xuddi shunday prognozni bildirgan edi.
Ular bu dinamikani Xitoyning koronavirus lokdaunlari, chakana savdo va sanoat ishlab chiqarishining pasayishi bilan bog‘ladi. Bu esa Pekin va Vashingtonda potensial siyosiy oqibatlarga olib keladigan rollarning o‘zgarishini ifodalaydi.
Shuningdek, Bloomberg ekspertlari Xitoy iqtisodining minimal o‘sishi bu yil 2 foizni tashkil qilishini, AQSHda YIM kamida 2,8 foizga o‘sishi mumkinligini prognoz qilgan.
Koronavirus pandemiyasidan oldin Xitoy yalpi ichki mahsulotining o‘sishi yiliga 6 foizdan yuqori bo‘lgan. Demak, bu ko‘rsatkich 2017-yilda 6,8 foiz, 2018-yilda 6,6 foiz, 2019-yilda esa 6 foizni tashkil etgan.
2020-yil mamlakatda YIM 2,3 foizga o‘sdi, bu so‘nggi 45 yildagi eng past ko‘rsatkichdir.
Xalqaro Valyuta Jamg‘armasi (XVJ) oktabr oyida AQSH iqtisodiyotining bu yilgi o‘sish sur’atlari 1,6 foiz, Xitoy iqtisodiyotida esa 3,2 foiz bo‘lishi kutilayotganini e’lon qildi.
Tashkilotning ta’kidlashicha, jahon iqtisodiyotining uchdan biridan ko‘prog‘i shu yoki kelgusi yilda qisqarishi kutilmoqda.
Noyabr oyida jahon iqtisodiyotining istiqbollari yomonlashdi, — dedi XVJ tadqiqoti iqtisodchisi Tryggvi Gudmundsson.
Jahon iqtisodiyotiga tahdidlar qatorida u Xitoyda koronavirus cheklovlari va ko‘chmas mulk bozoridagi inqiroz tufayli zaif o‘sishni qayd etdi.
Avvalroq jahon iqtisodiyoti 2009-yildagi inqiroz darajasida sekinlashishi prognoz qilingani haqida xabar berilgandi.
Izoh (0)