O‘zbekistonda yil boshidan beri soliq tushumlari qanday o‘zgargani tahlil qilindi. Bu haqda “Daryo”ga Iqtisodiy tadqiqotlar va islohotlar markazi xabar bermoqda.
Joriy yilning 1-yanvaridan 30-noyabrigacha bo‘lgan davrda mamlakat soliq tushumlari hajmi o‘tgan yilning shu davriga nisbatan 17,2 foizga oshgan.
Farg‘ona (34,2 foiz), Samarqand (34 foiz), Buxoro (32,6 foiz), Jizzax (31,7 foiz), Sirdaryo (29,6 foiz) viloyatlarida, Qoraqalpog‘iston Respublikasida (31,9 foiz) va Toshkent shahrida (42,7 foiz) soliq tushumlarining sezilarli o‘sishi qayd etildi.
Budjetga soliq tushumlarining o‘sishi barqaror tendensiyani saqlab kelmoqda.
Tahlillarga ko‘ra, joriy yilning 11 oyi davomida soliq tushumlarining o‘sishiga: qo‘shilgan qiymat solig‘i (32,6 foiz) va aylanmada olinadigan soliq (44,4 foiz) katta ta’sir ko‘rsatdi.
Shuningdek, yil boshidan buyon tashkilotlar tomonidan to‘langan daromad solig‘i 53,8 foizga ko‘paydi.
Shu bilan birga, soliq tushumlarining o‘sishiga yangi korxonalarning 2021-yilning shu davriga nisbatan 14,4 foizga ko‘payishi ta’sir ko‘rsatdi.
Shunday qilib, yil boshidan buyon 82 mingdan ortiq yangi korxonalar tashkil etildi. Ularning eng ko‘pi Samarqand (9 332), Farg‘ona (7 951), Qashqadaryo (7 470), Toshkent (6 325), Xorazm (5 240) viloyatlarida va Toshkent (14 408) shahrida ro‘yxatga olingan.
Davlat soliq qo‘mitasiga ko‘ra, O‘zbekistonda joriy yilning 11 oyida soliq organlari tomonidan 135,8 trln so‘m tushumlar ta’minlanib, o‘tgan yilning mos davriga nisbatan 20 trln so‘mga o‘sishga erishildi.
Soliq turlari kesimida mol-mulk solig‘idan 3,6 trln so‘m undirilib, o‘tgan yilning mos davriga nisbatan 1,3 trln so‘mga yoki 157 foizga o‘sishga erishildi.
Shuningdek, yanvar—noyabr oylarida yer solig‘idan 4,8 trln so‘m undirilgan. Bu ko‘rsatkich 2021-yilning mos davriga nisbatan 1,2 trln so‘mga yoki 133 foizga o‘sgan.
Bundan tashqari, aylanmada olinadigan soliqlardan 2,3 trln so‘m undirilgan bo‘lsa, QQS tushumlari 30,4 trln so‘mni tashkil qilgan.
Izoh (0)