Oliy Majlis Senatining yangi binosida energotaqchillik sezilyapti. Bu haqda senatorlar Bahodir Tojiyev va Farhod Boqiyev UzReport TV’ga bergan intervyusida aytib o‘tdi.
Bahodir Tojiyevning ta’kidlashicha, u ishxona sovuqligidan palto kiyib ishlashga majbur bo‘lmoqda.
Bugun Senatda ham “svet” o‘chyapti. To‘g‘risini aytaman, o‘zim ikkinchi qavatda ishlayman, xonamning harorati 15-20 darajadan oshmayapti. Xonamda palto kiyib o‘tiraman, buni men yashirmayman.Bahodir Tojiyev intervyuda 8 yildan beri Toshkentda yashashi, shaharda hali hech bunaqa sovuqni ko‘rmaganini aytdi.
Ijtimoiy tarmoqlarda xalqimizning haqli e’tirozlari bo‘layotganini kuzatyapmiz, bu jarayonda tomoshabin bo‘lib turishga hech birimizning haqqimiz yo‘q. Bu muammolar tez kunlarda bartaraf qilinadi. Bunaqangi sovuqni biz kutishimiz kerak, qish kelsa, albatta sovuq bo‘ladi, bunga tayyorgarlik ko‘rishimiz lozim. Ish bo‘lyapti, muammolar kelib chiqyapti, lekin prezidentimiz rahbarligida barcha soha mutaxassislari tun-u kun xalqimizni rozi qilish uchun muammolarni bartaraf qilish ustida ishlashmoqda.Yana bir senator Farhod Boqiyev “manaman degan davlatlarda ham” energiya ta’minotida “beqarorlik” bo‘layotganini aytgan.
Senatda bino issiqmi, yo‘qmi degan savoldan boshlaylik. Senatda ham binolar sovuq. Salqin xonada o‘tiribmiz. Yashiradigan joyi yo‘q, bu fakt. Bugungi kunda manaman degan rivojlangan davlatlarda ham energoresurslar bilan bog‘liq beqarorlik yuz beryapti.Farhod Boqiyevning qo‘shimcha qilishicha, senatorlar barcha hududlarga biriktirilgan bo‘lib, bugungi murakkab vaziyatda ular mahallalarda uyma-uy yuribdi.Ikkinchidan, bugun iste’mol keskin darajada oshib ketdi. Ayni paytda eksport to‘xtatilgan, O‘zbekiston birorta chet davlatga tabiiy gaz eksport qilmayapti. Davlat bugungi kunda aholini gaz, elektr energiyasi bilan ta’minlash uchun bu resurslarni xorijdan import qilmoqda. Bu ayni paytda kerak va to‘g‘ri qaror deb o‘ylayman.
Gaz bilan, elektr energiyasi resurslari bilan yuzaga kelishi mumkin bo‘lgan taqchilliklarning mohiyatini yoz oylarida ham xalqimizga tushuntirish imkoniyati mavjud edi. O‘sha paytdanoq bu narsalarni tushuntirib kelganimizda edi, ayrim masalalarda tayyorgarlik boshqacharoq bo‘lgan bo‘lardi.
Bugungi kunda yashil energetikaga o‘tish, muqobil energiyaning foydasi qanchalik yuqori ekanini statistika ham ko‘rsatmoqda. Bu borada ham O‘zbekistonda aniq strategiya, aniq chora-tadbirlar bor. Biroq bizga quruq gaplardan ko‘ra aniq amalda ko‘rsatib beradigan tizim, misollar ustida ishlasak, buning natijasiga tezroq yetib boramiz.
Farhod Boqiyev, senator
“Xalqning muammolarini parlament eshityapti, eshitmayapti emas. Ijtimoiy tarmoqda chiqqan voqelik qaysidir mas’ul vazirlik tizimiga tegishli bo‘lsa-da, bu masala parlamentning tegishli qo‘mitasi tomonidan davlat nazoratiga olinmoqda”, – degan senator so‘zi yakunida.