Ijtimoiy tarmoqda UzASBO dasturining ishida olti kundan beri nosozlik kuzatilayotgani haqida xabar tarqaldi. Ma’lum qilinishicha, respublika bo‘yicha ko‘plab operatsiyalar to‘xtab qolgan va tegishli guruhda vahima ko‘tarilgan.
Xususan, huquqshunos va bloger Bahodir Ahmedov Telegram’dagi kanalida shunday yozadi:
Butun O‘zbekiston bo‘ylab UzASBO tizimi orqali hujjat almashishda nosozlik kuzatilayotgani aytilmoqda. Nima bo‘lyapti o‘zi? Nega buxgalterlar norozi? Moliya vazirligi bir nima deydimi”– deb yozgan u.
Tilshunos va bloger Eldor Asanov ham UzASBO bilan bog‘liq vaziyat jiddiy ekanini, tizim olti kundan beri nosozligini yozdi.
Hamma svet-gaz muammosi bilan band bo‘lib turganda boshqa tomondan og‘ir zarba yaqinlashmoqda. G‘aznachilik amaliyotlariga bog‘lab qo‘yilgan UzAsbo dasturining ishida olti kundan buyon nosozlik kuzatilyapti. Respublika bo‘yicha ko‘plab operatsiyalar to‘xtab qolgan, tegishli guruhda vahima ko‘tarilgan, buxgalterlar to‘lovlar, oyliklar kechikishi mumkinligini aytmoqda. Bu haqda boshqa ma’lumot topa olmadim, ammo xavotirga tushib qoldim. Biror munosabat, ma’lumot kutamiz.
Mazkur holat yuzasidan Moliya vazirligi huzuridagi Axborot texnologiyalari markazi Telegram’dagi kanalida munosabat bildirdi.
Hurmatli UzASBO tizimi foydalanuvchilari. Server bilan bog‘liq muammolar sababli tizimda uzilishlar kuzatildi. Nosozliklarni bartaraf etish yuzasidan texnik ishlar amalga oshirilganligini hamda tizim faoliyati to‘liq yo‘lga qo‘yish yuzasidan doimiy monitoring olib borilayotganligini ma’lum qilamiz. Yuzaga kelgan noqulayliklar uchun uzr so‘raymiz. Shuningdek, tizim faoliyatiga oid qo‘shimcha savollaringiz yuzasidan tegishli hududiy bo‘linmalarning ushbu ichki raqamlari orqali murojaat qilishingiz mumkin.
Ammo ushbu xabar markaz kanalidan o‘chirib yuborildi. Markaz kanalida UzASBO dasturiy ta’minoti bo‘yicha hududiy bo‘linmalarning ichki raqamlari keltirilgan.
Umuman olganda, UzASBO bilan bog‘liq nosozliklar tez-tez uchrab turadi. Masalan, iyun oyida O‘zbekistonda o‘qituvchilarga mehnat ta’tili to‘lovi ham mazkur tizimda kuzatilayotgan nosozliklar sabab kechikkan edi.
Izoh (0)