Ижтимоий тармоқда UzASBO дастурининг ишида олти кундан бери носозлик кузатилаётгани ҳақида хабар тарқалди. Маълум қилинишича, республика бўйича кўплаб операциялар тўхтаб қолган ва тегишли гуруҳда ваҳима кўтарилган.
Хусусан, ҳуқуқшунос ва блогер Баҳодир Аҳмедов Telegram’даги каналида шундай ёзади:
Бутун Ўзбекистон бўйлаб UzASBO тизими орқали ҳужжат алмашишда носозлик кузатилаётгани айтилмоқда. Нима бўляпти ўзи? Нега бухгалтерлар норози? Молия вазирлиги бир нима дейдими»– деб ёзган у.
Тилшунос ва блогер Элдор Асанов ҳам UzASBO билан боғлиқ вазият жиддий эканини, тизим олти кундан бери носозлигини ёзди.
Ҳамма свет-газ муаммоси билан банд бўлиб турганда бошқа томондан оғир зарба яқинлашмоқда. Ғазначилик амалиётларига боғлаб қўйилган УзАсбо дастурининг ишида олти кундан буён носозлик кузатиляпти. Республика бўйича кўплаб операциялар тўхтаб қолган, тегишли гуруҳда ваҳима кўтарилган, бухгалтерлар тўловлар, ойликлар кечикиши мумкинлигини айтмоқда. Бу ҳақда бошқа маълумот топа олмадим, аммо хавотирга тушиб қолдим. Бирор муносабат, маълумот кутамиз.
Мазкур ҳолат юзасидан Молия вазирлиги ҳузуридаги Ахборот технологиялари маркази Telegram’даги каналида муносабат билдирди.
Ҳурматли UzASBO тизими фойдаланувчилари. Сервер билан боғлиқ муаммолар сабабли тизимда узилишлар кузатилди. Носозликларни бартараф этиш юзасидан техник ишлар амалга оширилганлигини ҳамда тизим фаолияти тўлиқ йўлга қўйиш юзасидан доимий мониторинг олиб борилаётганлигини маълум қиламиз. Юзага келган ноқулайликлар учун узр сўраймиз. Шунингдек, тизим фаолиятига оид қўшимча саволларингиз юзасидан тегишли ҳудудий бўлинмаларнинг ушбу ички рақамлари орқали мурожаат қилишингиз мумкин.
Аммо ушбу хабар марказ каналидан ўчириб юборилди. Марказ каналида UzASBO дастурий таъминоти бўйича ҳудудий бўлинмаларнинг ички рақамлари келтирилган.
Умуман олганда, UzASBO билан боғлиқ носозликлар тез-тез учраб туради. Масалан, июнь ойида Ўзбекистонда ўқитувчиларга меҳнат таътили тўлови ҳам мазкур тизимда кузатилаётган носозликлар сабаб кечиккан эди.
Изоҳ (0)