Sirdaryo viloyati Boyovut tumanida kredit mablag‘larini maqsadsiz yo‘naltirgan hokim yordamchisiga jinoyat ishi qo‘zg‘atildi. Bu haqda Korrupsiyaga qarshi kurashish agentligi axborot xizmati xabar berdi.
Qayd etilishicha, agentlik tomonidan Sirdaryo viloyatida o‘tkazilgan o‘rganishda oilaviy tadbirkorlik dasturlari doirasida ajratilgan imtiyozli kreditlarning maqsadsiz ishlatilayotgani, ta’minotchi korxonalar tomonidan fuqarolarga yetkazib berilishi mumkin bo‘lgan tovarlarni xarid qilmagani aniqlandi.
Xususan, Boyovut tumani hokimi yordamchisi T.J. ta’sischiligida 3 ta tadbirkorlik subyekti tashkil etilgan bo‘lib, shundan “B.L.B.” MCHJga 12 holatda fuqarolarning 371,5 million so‘m kredit mablag‘lari o‘tkazib berilgan va ushbu mablag‘lar maqsadsiz yo‘naltirilgan.
O‘rganish natijalari bo‘yicha to‘plangan hujjatlar qonuniy qaror qabul qilish uchun Bosh prokuraturaga yuborildi va prokuratura tomonidan mazkur holat bo‘yicha tergovga qadar tekshiruv o‘tkazildi.
Unga ko‘ra, Boyovut tumani hokimi yordamchisi T.J.ga va boshqalarga nisbatan Jinoyat kodeksining 167-moddasi (o‘zlashtirish yoki rastrata yo‘li bilan talon-toroj qilish) 2-qismi “v”, “g” bandlari va 209-moddasi (mansab soxtakorligi) 1-qismi bilan jinoyat ishi qo‘zg‘atilib, hozirgi kunda tergov harakatlari olib borilmoqda.
Mavzuga doir:
Izoh (0)