“O‘rtadagi 13 yosh farq pasportdagi raqamlar xolos”: aktyor Xyu Jekman rafiqasi bilan birga o‘tkazgan yaxshi-yomon kunlari haqida

Xyu Jekman omadli odamlardan biri, chunki u bir umr birga bo‘ladigan ko‘nglidagi ayolni uchratgan. Deborra-Li esa aktyordan 13 yosh katta bo‘lsa-da, bu yosh farqi oshiqlar uchun to‘siq bo‘lolmadi.

1995-yilda Xyu Jekman G‘arbiy Avstraliya san’at akademiyasini tamomlagandan keyin o‘zining birinchi loyihalaridan biri bo‘lgan “Korrelli” serialida rol o‘ynaydi. Uning uchun bu film shon-shuhrat chiptasi edi, tez orada aktyorning hayoti butunlay o‘zgaradi.

Aynan suratga olish maydonchasida Jekman 20 yillik tajribaga ega bo‘lgan aktrisa, rejissor va prodyuser Deborra-Li Ferness bilan tanishadi.

Aktyor o‘sha kunni xuddi kechagidek eslaydi:

Meni mashinada olib ketishdi, Deb esa oldingi o‘rindiqda o‘tirardi. Bu lahzani hech qachon unutmayman. U xavfsizlik kamarini yechdi-da, orqasiga o‘girilib, qo‘lini menga uzatdi. Quyoshdan saqlaydigan ko‘zoynagini yechib: “Salom, men Deborra-Li Fernessman. Tanishganimdan xursandman”, — dedi. O‘shanda “Menga bu qiz yoqib qoldi” deb o‘ylaganim hamon yodimda.

Jekman yuragida Fernessga bo‘lgan hisni aniq bilsa-da, uni uchrashuvga taklif qilishni yoki tuyg‘ularini qanday izhor qilishni bilmas edi. Axir ular hamkasb edilar. Bu xotira ham uning ongida muhrlanib qoladi.

“Deb bilan qadrdon do‘st bo‘lib qolgandik, uni sevib qolganimni angladim. Bunday bo‘lishi mumkin emasdi. Bu noprofessionallik”, — deb o‘rtoqlashadi aktyor. Shu sababli Jekman aktrisa bilan munosabatlarini to‘xtatishga qaror qiladi.

Vaqt o‘tishi bilan Jekman hamkasbiga e’tibor bermaslik to‘g‘ri yo‘l emasligini tushunadi va strategiyasini biroz o‘zgartirishga qaror qiladi. Xyu uni 20 kishi bilan birga uyiga kechki ovqatga taklif qiladi. O‘sha oqshom aktyor kutmagan voqea sodir bo‘ladi.

U menga qarab “Bir haftadan beri men bilan gaplashmayotganingni payqadim. Nima bo‘lyapti?” dedi. “Seni yaxshi ko‘raman. Lekin bu o‘tib ketadi, kechirasan”, — dedim javoban. U esa hayratlanib “Rostanmi? Sen ham menga yoqasan”, — dedi. Men bunday javobni xayolimga ham keltirmagandim, — deb eslaydi aktyor.

Axir Debora bu kechki ovqatga kelish uchun Mik Jagger taklif qilgan uchrashuvdan voz kechgandi.

Keyingi haftalarda juftlik munosabatlarini sir saqlashga harakat qildi, ammo barcha urinishlar besamar ketdi. Ularning orasidagi tuyg‘u shu qadar aniq ediki, ijodiy jamoa hammasini tushundi.

Avvaliga Ferness hamkasbi, bu ham mayli, o‘zidan ancha yosh yigit bilan munosabatga kirishish kerakmi yoki yo‘qligiga shubha qildi. U hatto bir muddat Jekmanni tark ham etdi, lekin keyinroq fikrini o‘zgartirdi. Oxir-oqibat ular birga bo‘lishga qaror qilishdi.

Tanishganlaridan 4 oy o‘tgach, Jekman Fernessga dizayni ustida o‘zi ishlagan unashtiruv uzugini hadya qiladi. Aktrisa shunday eslaydi:

U zargarlik buyumlari va olmoslar haqida hech narsa bilmagani uchun juda xavotirda edi. Zargarning oldiga borib: “Men aynan qanday uzuk olishni bilmayman, maslahat berishingiz uchun Deb haqida bir oz gapirib beraman”, debdi. Bechora zargar 1,5 soat men haqimdagi bitmas-tuganmas hikoyalarni tinglabdi.

Uchrashganlaridan 11 oy o‘tgach, Ferness va Jekman Avstraliyaning Viktoriya shahrida nikohdan o‘tishadi. Jekman marosimda bir-biriga beriladigan uzuklarning dizaynini ham o‘z zimmasiga olgan edi.

Ularning hayoti faqat baxtli daqiqalarga to‘la bo‘ladi, deb o‘ylash mumkin. Ammo hammasi oson bo‘lmaydi.

Ular turmush qurganlarida Ferness 40 yoshda edi, shuning uchun er-xotin tezroq farzand ko‘rishni xohlashadi. Ammo barcha urinishlar muvaffaqiyatsiz tugaydi. Jekman bu haqda shunday dedi:

Biz harakat qildik, ammo natija bo‘lmasdi, qiyin damlar edi. Fernessning homilasi nobud bo‘lgan kun hech qachon yodimdan chiqmaydi... Bu haqda gapira olganimdan xursandman. Qiyin kunlar o‘tib ketdi.

Ko‘p urinishlardan so‘ng Jekman va Ferness boshqa yo‘l bilan ota-ona bo‘lishga qaror qilishadi. 2000-yilda er-xotin farzand asrab olishadi. Ular yangi oila a’zosiga Oskar Maksimilian deb ism berishadi.

Aktrisaning so‘zlariga ko‘ra, ularning ikkalasi ham Oskarning biologik onasi ko‘zi yorigan palatada bo‘lgan. Jekman hatto chaqaloqning kindigini o‘zi kesgan va bola darhol aktrisaning qo‘liga berilgan.

5 yil o‘tgach, oila Ava Eliot ismli qizni asrab olishadi.

Aktyor ularni asrab olgan ota-onalar emas, o‘ziniki deb bilishini va farzandlari ham xuddi shunday fikrda bo‘lishi uchun qo‘lidan kelganini qilayotganini aytadi. Qiyinchiliklarga qaramay, Jekman va Ferness o‘zlari orzu qilgan oilani qurishdi.

Er-xotin har doim bir-birlarini qanchalik sevishlarini butun dunyoga ko‘rsatishga harakat qilishadi. Misol uchun, 2016-yilda ular hamma ishini tashlab, bir haftaga Karib dengiziga ketishdi. 2 yildan so‘ng esa Italiyaning Kapri shahriga sayohat qilishdi. 2021-yilda sevishganlar kumush to‘ylarini nishonlab, Jekman o‘z baxtini ijtimoiy tarmoqlarda baham ko‘rdi.

Sen bilan o‘zimni juda yaxshi his qilaman, Deb. Ilk uchrashganimizdanoq birga bo‘lishimizni bilardim. O‘tgan 25 yil ichida sevgimiz yanada kuchaydi. Hayotimni oilam va sen bilan o‘tkazayotganimdan cheksiz minnatdorman. Va bu hali boshlanishi. Deb, men seni chin yurakdan sevaman!

Bu yil Jekman va Ferness to‘ylarining 26 yilligini nishonladilar. Shuncha vaqt o‘tsa-da ularning bir-biriga bo‘lgan his-tuyg‘ulari yanada kuchayganga o‘xshaydi.

Birgalikda o‘tkazgan yillar davomida hurmat, muhabbat va o‘zaro ishonch oradagi 13 yosh farqdan ham ko‘proq narsani anglatadi. Ularning hikoyasi yosh haqiqiy sevgi uchun pasportdagi raqamdan boshqa narsa emasligini isbotlaydi.

Mavzuga doir: 

• “Mening eng xavfli dushmanim o‘zim ekanimni bilaman” — aktrisa va xonanda Lindsi Lohan 3 yoshida boshlangan karyerasidagi tub burilishlar haqida
• Gollivud yulduzi Juliya Roberts karyerasidan 20 yillik tanaffus olishga nima turtki bo‘lgani haqida gapirdi
• “Hammasi qahvaxonadan boshlangan”: Kemeron Dias va Dryu Berrimorning vaqt sinovidan o‘tgan do‘stligi (foto)