«Ўртадаги 13 ёш фарқ паспортдаги рақамлар холос»: актёр Хью Жекман рафиқаси билан бирга ўтказган яхши-ёмон кунлари ҳақида

Хью Жекман омадли одамлардан бири, чунки у бир умр бирга бўладиган кўнглидаги аёлни учратган. Деборра-Ли эса актёрдан 13 ёш катта бўлса-да, бу ёш фарқи ошиқлар учун тўсиқ бўлолмади.

1995 йилда Хью Жекман Ғарбий Австралия санъат академиясини тамомлагандан кейин ўзининг биринчи лойиҳаларидан бири бўлган «Коррелли» сериалида рол ўйнайди. Унинг учун бу фильм шон-шуҳрат чиптаси эди, тез орада актёрнинг ҳаёти бутунлай ўзгаради.

Айнан суратга олиш майдончасида Жекман 20 йиллик тажрибага эга бўлган актриса, режиссёр ва продюсер Деборра-Ли Фернесс билан танишади.

Актёр ўша кунни худди кечагидек эслайди:

Мени машинада олиб кетишди, Деб эса олдинги ўриндиқда ўтирарди. Бу лаҳзани ҳеч қачон унутмайман. У хавфсизлик камарини ечди-да, орқасига ўгирилиб, қўлини менга узатди. Қуёшдан сақлайдиган кўзойнагини ечиб: «Салом, мен Деборра-Ли Фернессман. Танишганимдан хурсандман», — деди. Ўшанда «Менга бу қиз ёқиб қолди» деб ўйлаганим ҳамон ёдимда.

Жекман юрагида Фернессга бўлган ҳисни аниқ билса-да, уни учрашувга таклиф қилишни ёки туйғуларини қандай изҳор қилишни билмас эди. Ахир улар ҳамкасб эдилар. Бу хотира ҳам унинг онгида муҳрланиб қолади.

«Деб билан қадрдон дўст бўлиб қолгандик, уни севиб қолганимни англадим. Бундай бўлиши мумкин эмасди. Бу нопрофессионаллик», — деб ўртоқлашади актёр. Шу сабабли Жекман актриса билан муносабатларини тўхтатишга қарор қилади.

Вақт ўтиши билан Жекман ҳамкасбига эътибор бермаслик тўғри йўл эмаслигини тушунади ва стратегиясини бироз ўзгартиришга қарор қилади. Хью уни 20 киши билан бирга уйига кечки овқатга таклиф қилади. Ўша оқшом актёр кутмаган воқеа содир бўлади.

У менга қараб «Бир ҳафтадан бери мен билан гаплашмаётганингни пайқадим. Нима бўляпти?» деди. «Сени яхши кўраман. Лекин бу ўтиб кетади, кечирасан», — дедим жавобан. У эса ҳайратланиб «Ростанми? Сен ҳам менга ёқасан», — деди. Мен бундай жавобни хаёлимга ҳам келтирмагандим, — деб эслайди актёр.

Ахир Дебора бу кечки овқатга келиш учун Мик Жаггер таклиф қилган учрашувдан воз кечганди.

Кейинги ҳафталарда жуфтлик муносабатларини сир сақлашга ҳаракат қилди, аммо барча уринишлар бесамар кетди. Уларнинг орасидаги туйғу шу қадар аниқ эдики, ижодий жамоа ҳаммасини тушунди.

Аввалига Фернесс ҳамкасби, бу ҳам майли, ўзидан анча ёш йигит билан муносабатга киришиш керакми ёки йўқлигига шубҳа қилди. У ҳатто бир муддат Жекманни тарк ҳам этди, лекин кейинроқ фикрини ўзгартирди. Охир-оқибат улар бирга бўлишга қарор қилишди.

Танишганларидан 4 ой ўтгач, Жекман Фернессга дизайни устида ўзи ишлаган унаштирув узугини ҳадя қилади. Актриса шундай эслайди:

У заргарлик буюмлари ва олмослар ҳақида ҳеч нарса билмагани учун жуда хавотирда эди. Заргарнинг олдига бориб: «Мен айнан қандай узук олишни билмайман, маслаҳат беришингиз учун Деб ҳақида бир оз гапириб бераман», дебди. Бечора заргар 1,5 соат мен ҳақимдаги битмас-туганмас ҳикояларни тинглабди.

Учрашганларидан 11 ой ўтгач, Фернесс ва Жекман Австралиянинг Виктория шаҳрида никоҳдан ўтишади. Жекман маросимда бир-бирига бериладиган узукларнинг дизайнини ҳам ўз зиммасига олган эди.

Уларнинг ҳаёти фақат бахтли дақиқаларга тўла бўлади, деб ўйлаш мумкин. Аммо ҳаммаси осон бўлмайди.

Улар турмуш қурганларида Фернесс 40 ёшда эди, шунинг учун эр-хотин тезроқ фарзанд кўришни хоҳлашади. Аммо барча уринишлар муваффақиятсиз тугайди. Жекман бу ҳақда шундай деди:

Биз ҳаракат қилдик, аммо натижа бўлмасди, қийин дамлар эди. Фернесснинг ҳомиласи нобуд бўлган кун ҳеч қачон ёдимдан чиқмайди... Бу ҳақда гапира олганимдан хурсандман. Қийин кунлар ўтиб кетди.

Кўп уринишлардан сўнг Жекман ва Фернесс бошқа йўл билан ота-она бўлишга қарор қилишади. 2000 йилда эр-хотин фарзанд асраб олишади. Улар янги оила аъзосига Оскар Максимилиан деб исм беришади.

Актрисанинг сўзларига кўра, уларнинг иккаласи ҳам Оскарнинг биологик онаси кўзи ёриган палатада бўлган. Жекман ҳатто чақалоқнинг киндигини ўзи кесган ва бола дарҳол актрисанинг қўлига берилган.

5 йил ўтгач, оила Ава Элиот исмли қизни асраб олишади.

Актёр уларни асраб олган ота-оналар эмас, ўзиники деб билишини ва фарзандлари ҳам худди шундай фикрда бўлиши учун қўлидан келганини қилаётганини айтади. Қийинчиликларга қарамай, Жекман ва Фернесс ўзлари орзу қилган оилани қуришди.

Эр-хотин ҳар доим бир-бирларини қанчалик севишларини бутун дунёга кўрсатишга ҳаракат қилишади. Мисол учун, 2016 йилда улар ҳамма ишини ташлаб, бир ҳафтага Кариб денгизига кетишди. 2 йилдан сўнг эса Италиянинг Капри шаҳрига саёҳат қилишди. 2021 йилда севишганлар кумуш тўйларини нишонлаб, Жекман ўз бахтини ижтимоий тармоқларда баҳам кўрди.

Сен билан ўзимни жуда яхши ҳис қиламан, Деб. Илк учрашганимизданоқ бирга бўлишимизни билардим. Ўтган 25 йил ичида севгимиз янада кучайди. Ҳаётимни оилам ва сен билан ўтказаётганимдан чексиз миннатдорман. Ва бу ҳали бошланиши. Деб, мен сени чин юракдан севаман!

Бу йил Жекман ва Фернесс тўйларининг 26 йиллигини нишонладилар. Шунча вақт ўтса-да уларнинг бир-бирига бўлган ҳис-туйғулари янада кучайганга ўхшайди.

Биргаликда ўтказган йиллар давомида ҳурмат, муҳаббат ва ўзаро ишонч орадаги 13 ёш фарқдан ҳам кўпроқ нарсани англатади. Уларнинг ҳикояси ёш ҳақиқий севги учун паспортдаги рақамдан бошқа нарса эмаслигини исботлайди.

Мавзуга доир: 

• «Менинг энг хавфли душманим ўзим эканимни биламан» — актриса ва хонанда Линдси Лоҳан 3 ёшида бошланган карьерасидаги туб бурилишлар ҳақида
• Голливуд юлдузи Жулия Робертс карьерасидан 20 йиллик танаффус олишга нима туртки бўлгани ҳақида гапирди
• «Ҳаммаси қаҳвахонадан бошланган»: Кемерон Диас ва Дрю Берриморнинг вақт синовидан ўтган дўстлиги (фото)