Mashhurlar haqidagi ba’zi ma’lumotlar muxlislarni hayratda qoldiradi. The Voice nashri egizagi bor mashhurlar ro‘yxatini taqdim etdi.
Aleksandr va Natalya Revva
Natalya mashhur xonanda va komikdan 15 daqiqa avval dunyoga kelgan. Egizaklar bolaligidan birga o‘sib-ulg‘aygan, raqs bilan shug‘ullangan. Maktabda bitta partada o‘tirib tahsil olgan opa-ukalar oliy ta’limda turli yo‘nalishni tanlashni afzal bilgan. Aleksandr texnika, Natalya esa xorijiy tillar bo‘yicha o‘qigan. Keyinchalik Natalya turmushga chiqib Donetskka jo‘nab ketgan. Masofalar uzoq ekaniga qaramay, egizaklar bir-biridan doimiy ravishda hol-ahvol so‘rab turadi.
Rami va Sami Malek
Egizaklar 1981-yil 12-mayda dunyoga kelgan. Rami ukasi Samidan naq 4 daqiqaga katta. Akasidan farqli ravishda kichik Malek san’atni emas, ingliz tilidan o‘qituvchilik qilishni ma’qul bilgan. Ijtimoiy tarmoqlarda sahifasi mavjud bo‘lmagan Sami hamisha akasini qo‘llab-quvvatlab turadi. U 2019-yildagi “Oltin globus” taqdirlash marosimida akasining yonida bo‘lgan.
Yelena Malisheva va Aleksey Shabunin
Serfarzand oilada o‘sib-ulg‘aygan boshlovchining undan atigi yarim soatga katta akasi borligi haqida hamma ham bilavermaydi. Shabunin ham singlisi singari karyera borasida tibbiyot sohasini tanlagan. Bugungi kunda u shifoxonada jarroh sifatida faoliyat olib boradi.
Skarlett va Hanter Yoxansson
Aktrisa 22-sentabrda tavallud kunini bir o‘zi emas, undan 3 daqiqa keyin tug‘ilgan ukasi Hanter bilan birga nishonlaydi. 80-yillarda Yoxanssonning ota-onasi to‘rtala farzandini ham modellik biznesiga kiritishga harakat qilgan, ammo agentlar to‘ng‘ich farzand Edrianning o‘zini tanlash bilan cheklangan. Aynan shundan keyin Skarlett aktrisa bo‘lishga qaror qilgan. Hanter ham o‘zini kinosanoatda sinab ko‘rgan, hatto opasi bilan birga suratga ham tushib ulgurgan. Shundan keyin aktyorlik u uchun emasligini tushunib yetgan va siyosatda o‘zini topishga harakat qilgan. Barak Obama prezident bo‘lishidan avvalgi saylov jarayonida Hanter yetakchi mutaxassislar jamoasida bo‘lgan.
Linda va Lesli Xemilton
Opa-singillarning o‘rtasida 6 daqiqa farq bor: birinchi Lesli, keyin esa Linda dunyoga kelgan. Linda bolaligida opasiga o‘xshamaslik uchun qo‘lidan kelgan hamma narsani qilgan: soch turmagi va rangini o‘zgartirgan, kipriklarini kesgan, vazn to‘plagan. Shifokorlar salomatligida muammo borligini aniqlaganidan keyin esa ular bir-biridan ayrilmagan. Ko‘rinishi o‘xshash ekaniga qaramay, opa-singillarning kasb borasidagi tanlovlari farqli bo‘lgan. Linda aktrisalik, Lesli esa hamshiralik qilishni ma’qul bilgan.
Jizel va Patrisiya Bundxen
1980-yilda to‘rtta qiz o‘sib-ulg‘aygan Bundchen oilasida bir vaqtning o‘zida ikkita go‘zal qizaloq: egizak Jizel va Patrisiya tug‘ildi. Patrisiya Bundxen singlisi Jizeldan besh daqiqa oldin dunyoga kelgan.
Jizel o‘zining yorqin modellik karyerasi uchun opasiga qarzdor ekanini bir necha bor aytgan. Bir paytlar Patrisiya o‘zini model sifatida sinab ko‘rganiga qaramay, tez orada u singlisining menejeri bo‘lib qolishi va podiumlardan tashqari moda sanoatiga hissa qo‘shishi yaxshiroq ekanini tushunib yetadi.
Mavzuga doir:
- Mashhurlar oilasida dunyoga kelganini ko‘pchilik bilmaydigan Gollivud yulduzlari (foto).
- Farzandidan ayrilgan, 3 soat uxlagan, hojatxonada farroshlik qilgan: muvaffaqiyatga erishish yo‘lida turli qiyinchiliklardan o‘tgan yulduzlar (foto)
- Roli sabab tomoshabinlar tanqidi va g‘azabiga uchragan mashhur aktyor va aktrisalar (foto
- Filmning suratga olish jarayonida homiladorligini mohirlik bilan yashirgan aktrisalar (foto)
Izoh (0)