NATO Afg‘oniston uchun ajratilgan 3,4 mlrd dollarni Ukrainaga berishi mumkin — Politico

NATO davlatlari Afg‘oniston milliy armiyasini qo‘llab-quvvatlash uchun ajratilgan 3,4 milliard dollarni Ukrainaga berishga qaror qilishi mumkin. Bu haqda munozaradan xabardor g‘arb shaxslarga tayanib, Politico xabar berdi.

NATOda bunday qaror qabul qilishda jiddiy to‘siqlar yo‘q. Bu ba’zi mamlakatlar Ukrainaga harbiy yordam berish borasida ichki keskinlikka duch kelishi fonida yuz bermoqda. G‘arb qo‘shinlari Afg‘onistondan olib chiqib ketilganidan keyin jamg‘arma faoliyati muzlatib qo‘yilgan. Alyans pullarning mamlakatlarga qaytarilishi yoki boshqa dasturlarga o‘tkazishni ko‘rib chiqmoqda. Har bir davlat o‘z pullarini qanday boshqarishni o‘zi hal qilishi kerak. Ayrim davlatlar Ukrainaga qisman yoki to‘liq pul o‘tkazish masalasini ko‘rib chiqishga tayyorligini bildirgan.

Politico nashri xabar yuzasidan Ukraina rasmiylariga yuzlangan, biroq ular izoh berishdan bosh tortgan, NATO donor mamlakatlarga mablag‘larni qaytarish masalasi ko‘rib chiqilayotganini ta’kidlagan. Litva va Niderlandiya Afg‘oniston jamg‘armasi mablag‘larining bir qismini yoki to‘lig‘ini Ukrainaga berishga tayyorligini bildirgan.

Eslatib o‘tamiz, Ukraina tashqi ishlar vaziri Dmitriy Kuleba NATO mamlakatlarini Ukrainaga iloji boricha tezroq qurol-yarog‘ yuborishga va G‘arbda yangi qurol ishlab chiqarish korxonalarini ochishga chaqirgandi.

Mavzuga doir:

• “Putinning g‘alaba qozonishiga yo‘l qo‘ya olmaymiz” — NATO bosh kotibi
• Ukrainani hozircha NATOga qabul qilishmoqchi emas — Bloomberg
• Sunak 2023-yilda Kiyevga harbiy yordamni oshirishga va’da berdi