Rossiyaning 74 ta hududida cho‘chqa grippi aniqlandi

Rossiyada cho‘chqa grippi aniqlangan hududlar soni 74 taga yetdi. Bu haqda “Rospotrebnadzor” ma’lumotiga tayanib, “RIA Novosti” xabar berdi.

26-noyabr kuni cho‘chqa grippi aniqlangan subyektlar soni 55 tani tashkil qilgandi. Bir hafta ichida mamlakatda o‘tkir respirator virusli infeksiyalar va gripp bilan kasallanish 23,3 foizga oshgan.

“Mamlakatda respirator viruslar tarkibida rinoviruslar 13,3 foiz, RS viruslar 12,0 foiz, metapnevmoviruslar 10,1 foiz, adenoviruslar 7,2 foiz ulushni tashkil qilmoqda. Cho‘chqa grippi 74 ta hududda aniqlangan”, — deyiladi xabarda.

Sog‘liqni saqlash vaziri Mixail Murashko joriy mavsumda cho‘chqa grippi (H1N1) faol tarqala boshlaganini aytgan. Rasmiy aholini grippga qarshi emlanishga chaqirgan. Bundan tashqari, olti oy oldin koronavirusga qarshi emlanganlar qayta emlanishi kerakligi qo‘shimcha qilingan.

Mavzuga doir: Rossiyada cho‘chqa grippi epidemiyasi avj olmoqda