Germaniya AQSHdan 10 mlrd yevroga F-35 qiruvchilarini sotib oladi

Germaniya hukumati Amerikadan beshinchi avlod F-35 qiruvchilarini sotib olishga 10 milliard yevro (10,5 milliard dollar) yo‘naltiradi, deya xabar bermoqda Bloomberg hukumatning tegishli hujjatiga tayanib.

Qiruvchi samolyotlar 2026—2029-yillar oralig‘ida yetkazib berilishi kutilmoqda. Mablag‘lar Germaniya qurolli kuchlarini mustahkamlash uchun tuzilgan va hajmi 100 milliard yevrodan iborat fonddan ajratiladi. Agentlik ma’lumotlariga ko‘ra, Germaniya, shuningdek, “havo—yer” sinfidagi raketalarni va “yerusti infratuzilmasi”ni ham qo‘lga kiritadi, boshqa tafsilotlar keltirilmayapti.

Ushbu fond yaratilgani haqida Germaniya kansleri Olaf Shols fevralda e’lon qilgan edi. Sentabrda Bavariya bosh vaziri Markus Zyoder hukumat va’da qilingan mablag‘larni fondga yo‘naltirmaganini aytdi. Noyabrda esa Bundesver 20 milliard yevrolik o‘q-dorilar va askariy anjomlar tanqisligi yuzaga kelganini ma’lum qildi. Politico ma’lumotlariga ko‘ra, Germaniya Moliya vazirligi zaxiralarni to‘ldirish uchun mablag‘ ajratishdan bosh tortgan.

Avvalroq Germaniya kansleri Olaf Shols NATO bosh kotibi Yens Stoltenberg bilan qo‘shma matbuot anjumanida Germaniya Qurolli kuchlari (Bundesver) mushkul vaziyatga tushgani, aniqrog‘i, o‘q-dorilar tanqisligini boshidan kechirayotganini aytgandi.

Germaniya hukumati qurol-yarog‘ zaxiralari tanqisligi haqida birinchi marta gapirayotgani yo‘q. Avgust oyida bu haqda Germaniya tashqi ishlar vaziri Annalena Berbok ma’lum qilgandi. Germaniya sanoati bunday sharoitlarda Ukraina uchun ataylab qurol ishlab chiqarishga majbur bo‘lgan.

Noyabrda Germaniya mudofaa vaziri mamlakat NATO qarshisidagi majburiyatlari tufayli, uchinchi mamlakatlarning qurol-yarog‘ yetkazish haqidagi iltimoslariga javob qilishi qiyin ekanini aytgandi. Shu bilan birga, Lambrext Berlin Ukrainaga yordam ko‘rsatishda davom etishini ta’kidladi.

Oktabrda Business Insider nashri Bundestag rasmiy shaxslari va harbiy sanoat vakillari orasidagi manbalariga tayanib, jangovar harakatlar boshlanib qolgan taqdirda, Germaniya armiyasi bor-yo‘g‘i ikki kun jang qila olishi haqida yozgandi. Nashr ma’lumotlariga ko‘ra, Germaniya faqat o‘q-dorilar sotib olishga 20 milliard yevro sarflashi kerak, ayni vaqtda esa omborlar yetishmaydi, natijada bu masala bo‘yicha oldinda “ancha sa’y-harakatlar” kutmoqda.

Business Insider qayd etishicha, NATO qoidalariga ko‘ra, unga a’zo mamlakatlar 30 kunlik jangovar harakatlar uchun yetarli miqdorda o‘q-dorilarga ega bo‘lishi shart.