Германия АҚШдан 10 млрд еврога F-35 қирувчиларини сотиб олади

Германия ҳукумати Америкадан бешинчи авлод F-35 қирувчиларини сотиб олишга 10 миллиард евро (10,5 миллиард доллар) йўналтиради, дея хабар бермоқда Bloomberg ҳукуматнинг тегишли ҳужжатига таяниб.

Қирувчи самолётлар 2026—2029 йиллар оралиғида етказиб берилиши кутилмоқда. Маблағлар Германия қуролли кучларини мустаҳкамлаш учун тузилган ва ҳажми 100 миллиард евродан иборат фонддан ажратилади. Агентлик маълумотларига кўра, Германия, шунингдек, «ҳаво—ер» синфидаги ракеталарни ва «ерусти инфратузилмаси»ни ҳам қўлга киритади, бошқа тафсилотлар келтирилмаяпти.

Ушбу фонд яратилгани ҳақида Германия канцлери Олаф Шольц февралда эълон қилган эди. Сентябрда Бавария бош вазири Маркус Зёдер ҳукумат ваъда қилинган маблағларни фондга йўналтирмаганини айтди. Ноябрда эса Бундесвер 20 миллиард евролик ўқ-дорилар ва аскарий анжомлар танқислиги юзага келганини маълум қилди. Politico маълумотларига кўра, Германия Молия вазирлиги захираларни тўлдириш учун маблағ ажратишдан бош тортган.

Аввалроқ Германия канцлери Олаф Шольц НАТО бош котиби Йенс Столтенберг билан қўшма матбуот анжуманида Германия Қуролли кучлари (Бундесвер) мушкул вазиятга тушгани, аниқроғи, ўқ-дорилар танқислигини бошидан кечираётганини айтганди.

Германия ҳукумати қурол-яроғ захиралари танқислиги ҳақида биринчи марта гапираётгани йўқ. Август ойида бу ҳақда Германия ташқи ишлар вазири Анналена Бербок маълум қилганди. Германия саноати бундай шароитларда Украина учун атайлаб қурол ишлаб чиқаришга мажбур бўлган.

Ноябрда Германия мудофаа вазири мамлакат НАТО қаршисидаги мажбуриятлари туфайли, учинчи мамлакатларнинг қурол-яроғ етказиш ҳақидаги илтимосларига жавоб қилиши қийин эканини айтганди. Шу билан бирга, Ламбрехт Берлин Украинага ёрдам кўрсатишда давом этишини таъкидлади.

Октябрда Business Insider нашри Бундестаг расмий шахслари ва ҳарбий саноат вакиллари орасидаги манбаларига таяниб, жанговар ҳаракатлар бошланиб қолган тақдирда, Германия армияси бор-йўғи икки кун жанг қила олиши ҳақида ёзганди. Нашр маълумотларига кўра, Германия фақат ўқ-дорилар сотиб олишга 20 миллиард евро сарфлаши керак, айни вақтда эса омборлар етишмайди, натижада бу масала бўйича олдинда «анча саъй-ҳаракатлар» кутмоқда.

Business Insider қайд этишича, НАТО қоидаларига кўра, унга аъзо мамлакатлар 30 кунлик жанговар ҳаракатлар учун етарли миқдорда ўқ-дориларга эга бўлиши шарт.