“Toshkent metropoliteni” unitar korxonasining ma’lum qilishicha, “Beruniy” metrosida 4-dekabr kuni poyezd bir muddat to‘xtab qoldi.
Qayd etilishicha, soat 16:30 atrofida 37-sonli harakat tarkibi “Beruniy” bekatiga kirib kelgan va yo‘lovchilarni vagonlarga chiqargach, harakatlana olmagan. Yo‘lovchilar oqimi tirbandligi va yo‘nalishdagi harakat jadvaliga ta’sir ko‘rsatmasligi uchun mashinist tomonidan belgilangan yo‘riqnomaga asosan yo‘lovchilar bekatga tushirilgan. Harakat tarkibi esa texnik ko‘rikdan o‘tkazish maqsadida tekshiruv yo‘lagiga yuborilgan.
Tezkor tekshiruv o‘tkazilganda 37-sonli harakat tartibining 0003-sonli vagonida havo bosimi miqdori normal holatda emasligi aniqlangan hamda harakat jadvali buzilishining oldini olish maqsadida 16:37 da mavjud zaxira poyezdi yo‘lga chiqarilgan. Ushbu poyezd bekatdagi barcha yo‘lovchilarni olib, harakatni davom ettirgan.
Hozirda barcha poyezdlar belgilangan jadval asosida harakatlanmoqda.
Izoh (0)