O‘zbekistonning qator hududlarida aholi gaz ta’minoti bo‘yicha muammolardan shikoyat qilmoqda. Facebook’dagi “Potrebitel.uz” guruhiga 3-dekabr kuni fuqarolardan bir necha murojaatlar kelib tushgan.
Unda aytilishicha, ayrimlarda gaz umuman bo‘lmagan, ayrimlarida uning bosimi pastligidan choy qaynashini ham yarim soatlab kutishgan. Gaz ta’minotidagi muammolar haqida Samarqand, Qo‘qon, Sirdaryo, Toshkent shahri va viloyati aholisi xabar bergan.
Xususan, Toshkent viloyatida bunday murojaatlar Yangiyo‘l, Zangiota, G‘zalkent, Chirchiq, Bardanko‘l, Chorvoq va Bo‘stonliq qishloqlaridan kelib tushgan. Toshkent shahrida Shayxontohur, Mirzo Ulug‘bek, Yashnobod, Yakkasaroy, Mirobod, Segeli tumanlaridan shikoyatlar bo‘lgan. Yunusobod va Bektemir tumanlaridan gaz ta’minoti borasidagi murojaatlar nisbatan kamroq bo‘lgan.
Energetika vazirligi gaz konlarida tabiiy gaz zaxiralarining kamayib borayotgani sababli mamlakat hududlaridagi gaz konlarida rejaga nisbatan sutkasiga o‘rtacha 7 foizga kam tabiiy gaz qazib chiqarilayotganini ma’lum qilgandi.
Bugungi kunda ko‘rilayotgan choralarga qaramasdan, havo haroratining keskin sovib ketishi sababli quvurlarda gaz bosimining pasayishi kuzatilmoqda. Qazib chiqarilayotgan tabiiy gaz to‘liq ichki iste’mol uchun, xususan, aholi va ijtimoiy soha obyektlari hamda issiqlik elektr stansiyalariga yo‘naltirilmoqda, — deyilgan edi vazirlik axborotida.
Mavjud gaz konlarida tabiiy gaz qazib chiqarish hajmlari yildan yilga kamayib borayotgani kuzatilmoqda. 2021-yilda belgilangan rejaga nisbatan 229 million metr kub kam tabiiy gaz qazib chiqarilgan bo‘lsa, 2022-yilning 11 oyida rejaga nisbatan 5,8 foizga kam tabiiy gaz qazib chiqarildi.
Iqtisodchi Abdulla Abduqodirov ham bu muammoni tanqid qilib chiqdi.
Aynan shunday bo‘lishini men anchadan beri gapirib kelayotgan edim. Qishda qanday choralar ko‘rish mumkin gaz qazib olish hajmini oshirishga? 7-8 oy issiq kunlarda nima bilan shug‘ullandinglar? Ataylab hammani burchakka taqab, import qilinadigan gazni yagona chora qilish bilanmi? Ataylab hukumatni majburlayapsizlarmi?! Moliya vaziri nega faqat subsidiya to‘lash bilan band?! Nega sohani ichiga kirmaydi? Nega ichki ishlab chiqarishni oshirish ishlarini yil boshidan amalga oshirmaydi? Essiz xalqim, essiz davlat qudrati!, — deb yozgan u Facebook’dagi sahifasida.
Qayd etish lozim, so‘nggi kunlarda O‘zbekistonda havo harorati pasayib bormoqda. Navoiy viloyati “Oqbaytal” kuzatuv stansiyasida 4-dekabr erta tong havo harorati minimal qiymati naqd 20 daraja sovuqqacha pasaydi. 5-dekabrdan so‘ng joylarda havo harorati yanada pasayadi.
Izoh (0)