O‘zbekiston va Rossiya hukumati rahbarlari hamkorlikni yanada rivojlantirishga qaratilgan o‘ndan ortiq hujjatni imzoladi

O‘zbekiston va Rossiya hukumatlari rahbarlari ikki davlat o‘rtasidagi o‘zaro hamkorlikni yanada rivojlantirishga qaratilgan o‘ndan ortiq hujjatni imzoladi. Bu haqda Investitsiyalar va tashqi savdo vazirligi xabar berdi.

2-dekabr kuni Jamshid Xo‘jayev Samarqandda bo‘lib o‘tgan O‘zbekiston va Rossiya hukumatlari rahbarlari darajasidagi qo‘shma komissiyaning 3-majlisida ishtirok etgan. Bosh vazir Abdulla Aripov va Rossiya hukumati raisi Mixail Mishustin raisligida o‘tgan yig‘ilishda mamlakatlarimiz o‘rtasidagi strategik sheriklik va o‘zaro hamkorlik munosabatlarining bugungi holati va istiqbollari muhokama etilgan.

Majlisda hukumatlar oldiga turli sohalarda amaliy hamkorlikni har tomonlama rivojlantirish vazifasi qo‘yilgan. Istiqbolli sarmoyaviy loyihalar va savdo shartnomalarining amalga oshirilishini ta’minlash hamda madaniy-gumanitar hamkorlikni chuqurlashtirish rejalarini kelishib olindi.

Qayd etilishicha, so‘nggi besh yilda O‘zbekistonda Rossiya sarmoyasi ishtirokidagi korxonalar soni uch baravar ko‘payib, qariyb uch mingtaga yetdi. Birgina joriy yilda 700 ta korxona tashkil etildi. O‘z navbatida Rossiyada ham o‘zbek kapitali ishtirokida mingga yaqin korxona faoliyat yuritmoqda.

Bugungi kunda davlatlar o‘rtasida qishloq xo‘jaligi, to‘qimachilik va oziq-ovqat sanoati, farmatsevtika, elektrotexnika va mashinasozlik sohalarida sanoat kooperatsiyasi rivojlanmoqda.

Tomonlar transport va tranzit sohasidagi hamkorlikni kengaytirishdan manfaatdorligi bildirdi. Joriy yilda yuk tashish hajmi 21 foizga oshgani, bunda tranzit yuk tashishlar salmog‘i 25 foizga ko‘paygani mamnuniyat bilan qayd etildi. Shu bilan birga hududlar orqali tranzit yuk tashishda ishonchli transport-logistika zanjirlarini shakllantirish bo‘yicha hamkorlikni davom ettirish zarurligi ta’kidlandi.

Ta’lim va ilm-fan, madaniyat sohalaridagi hamkorlik ikki tomonlama munosabatlarning muhim yo‘nalishlaridan hisoblanadi. Ayni paytda O‘zbekistonda Rossiyadagi oliy ta’lim muassasalarining 14 ta filiali faoliyat yuritmoqda.

Majlis yakuniga ko‘ra, o‘zaro hamkorlikni yanada rivojlantirishga qaratilgan o‘ndan ortiq hujjat imzolandi.

Mavzuga doir: Mirziyoyev va Putin keng qamrovli strategik sheriklik to‘g‘risida deklaratsiya imzoladi (foto)