Samarqandda ham transport vositalarining yuqori harakat tezligi 60 kilometr/soat etib belgilanishi mumkin. Bu haqda Bu haqda viloyat IIB YHXB boshlig‘i Shavkat Boyxo‘rozov Xalq deputatlari viloyat kengashi sessiyasida ma’lum qilgan.
Uning so‘zlariga ko‘ra, bugungi kunda Samarqand viloyati hududidan o‘tuvchi avtomobil yo‘llari va ko‘chalarida harakat xavfsizligini ta’minlash, yo‘l-transport hodisalarini oldini olish hamda transport vositalarining yuqori harakatlanish tezligini kamaytirish maqsadida “Нuqori tezlik cheklangan” (60 kilometr/soat) yo‘l belgilarini o‘rnatish zarurati yuzaga keldi.
Ushbu tartibni belgilash uchun viloyat IIB yo‘l harakati xavfsizligi boshqarmasi aholi, haydovchi va yo‘lovchilar o‘rtasida so‘rovnoma tashkil etishi zarurligi qayd etilgan.
Viloyat IIB YHXB boshlig‘i ushbu tartib nima sababdan joriy etilishi belgilanayotgani hamda qaysi hududlarga o‘rnatilishi mumkinligiga to‘xtalib o‘tgan.
“Samarqand shahrining M-37A Samarqand halqa yo‘lining 40-43 kilometrlari oraliq qismida 3 yil davomida sodir etilgan YTHlar soni 29 tani tashkil etgan, shundan 6 tasi o‘lim, 23 tasi tan jarohati bilan bog‘liq. Bundan tashqari, Afrosiyob ko‘chasining Ibn Sino ko‘chasidan M-37A avtomobil yo‘ligacha bo‘lgan qismi uzunligi 1,7 kilometr, kengligi 17 metrni tashkil etib, 8 ta asosiy yo‘l bilan tutashmalar mavjud. Bu yo‘lda oxirgi 3 yil davomida 7 ta YTH sodir etilgan. Shundan 2 tasi o‘lim, 5 tasi tan jarohati bilan bog‘liq.
Dahbed ko‘chasining Ibn Sino ko‘chasidan Registon ko‘chasigacha bo‘lgan qismining uzunligi 2,8 kilometr, kengligi 15 metrni tashkil etadi. Oxirgi 3 yil davomida 24 ta YTH sodir etilgan. Shundan 4 tasi o‘lim, 20 tasi tan jarohati bilan bog‘liq.
Gagarin ko‘chasining Go‘ro‘g‘li ko‘chasidan O‘zbekiston ko‘chasigacha bo‘lgan qismi uzunligi 5,3 kilometr kengligi 30 metrni tashkil etadi. Oxirgi 3 yil davomida 13 ta YTH sodir etilgan.
Shulardan kelib chiqib, yo‘l-transport hodisalarini oldini olish va harakat xavfsizligini ta’minlash maqsadida Samarqand shahridagi M-37A Samarqand halqa yo‘lining 40-43 kilometrlar oraliq qismida, Afrosiyob, Dahbed va Gagarin ko‘chalarida transport vositalari harakatlanishining yuqori tezligini soatiga 60 kilometr etib belgilash taklif etilmoqda”, — degan u.
Mavzuga doir:
Izoh (0)