«Тошкент метрополитени» унитар корхонасининг маълум қилишича, «Беруний» метросида 4 декабрь куни поезд бир муддат тўхтаб қолди.
Қайд этилишича, соат 16:30 атрофида 37-сонли ҳаракат таркиби «Беруний» бекатига кириб келган ва йўловчиларни вагонларга чиқаргач, ҳаракатлана олмаган. Йўловчилар оқими тирбандлиги ва йўналишдаги ҳаракат жадвалига таъсир кўрсатмаслиги учун машинист томонидан белгиланган йўриқномага асосан йўловчилар бекатга туширилган. Ҳаракат таркиби эса техник кўрикдан ўтказиш мақсадида текширув йўлагига юборилган.
Тезкор текширув ўтказилганда 37-сонли ҳаракат тартибининг 0003-сонли вагонида ҳаво босими миқдори нормал ҳолатда эмаслиги аниқланган ҳамда ҳаракат жадвали бузилишининг олдини олиш мақсадида 16:37 да мавжуд захира поезди йўлга чиқарилган. Ушбу поезд бекатдаги барча йўловчиларни олиб, ҳаракатни давом эттирган.
Ҳозирда барча поездлар белгиланган жадвал асосида ҳаракатланмоқда.
Изоҳ (0)