Rossiya Yevropa Ittifoqi tashabbusi bilan Rossiyaning Ukrainadagi harakatlarini tekshiradigan maxsus tribunal yaratishni qonuniy deb tan olmaydi. Bu haqda Rossiya prezidenti matbuot kotibi Dmitriy Peskov “RBK”ga ma’lum qildi.
“Allaqanday tribunallar tuzishga urinishlar masalasiga kelsak, ular hech qanday qonuniylikka ega bo‘lmaydi, biz tomondan qabul qilinmaydi va qoralanadi”, — dedi Peskov.
Shu bilan birga, Peskovning ta’kidlashicha, rossiyalik tergovchilar “har kuni va deyarli har soatda Kiyev rejimining jinoyatlarini qayd etish” ustida ishlamoqda. Moskva 2014-yildan beri Kiyev tomonidan sodir etilgan “jinoyatlar”ni ham o‘rganmoqchi. G‘arb davlatlari Ukrainaning bunday harakatlariga munosabat bildirmagan, deb qo‘shimcha qildi u.
30-noyabr kuni Yevrokomissiya rahbari Ursula fon der Lyayen Rossiyaning Ukrainadagi harakatlarini tekshirish uchun BMT ko‘magida maxsus tribunal tashkil etishni taklif qilgandi.
Keyinroq Fransiya Yevropa va ukrainalik hamkorlari bilan birgalikda Rossiyaning Ukrainadagi “agressiv jinoyatlari” bo‘yicha maxsus tribunal yaratish ustida ish boshlaganini ma’lum qildi.
Rossiyaning BMTdagi doimiy vakili Vasiliy Nebenzya tribunal tashabbusini “o‘z qonunbuzarligini yashirishga urinish” va “BMT nufuzi ortiga bekinish” deb atadi. Rossiyaning BMT Jeneva shtab-kvartirasidagi doimiy vakili Gennadiy Gatilovning ta’kidlashicha, tribunalni tashkil etish uchun bu tashabbus BMT Xavfsizlik kengashida ma’qullanishi kerak.
Yevropa Ittifoqining anonim rasmiylari The Washington Post bilan suhbatda maxsus tribunal yaratish taklifini BMT Xavfsizlik Kengashidan o‘tkazib bo‘lmasligi (Rossiya u yerda veto huquqiga ega), ammo bu BMT Bosh Assambleyasi orqali amalga oshirilishi mumkinligi haqida fikr bildirgan.
Izoh (0)