Qonunchilik palatasi spikeri o‘rinbosari, “Milliy tiklanish” demokratik partiyasi markaziy kengashi raisi Alisher Qodirov shu kunlarda muhokamalar markazida bo‘lib turgan chet ellik tadbirkor va Toshkent shahri hokimi o‘rtasidagi mojaro bo‘yicha o‘z munosabatini bildirdi.
Tuhmat qilsa ham, xorijiy investor haq bo‘ladigan zamonlar tugaganini Minervaworld bilmagan. O‘zimizning do‘ppini o‘zimizga kiydirib, daromad reja qilgan “xorijiylar” xulosa qilishi kerak. Viloyat rahbarlari Ortiqxo‘jayev bilan maslahatlashib turishsa bo‘larkan. #stopslander (tuhmatni bas qiling), — deya post qoldirgan Alisher Qodirov.Qonunchilik palatasi deputati Doniyor G‘aniyev esa unga javob qaytarib, “Aksincha, Ortiqxo‘jayev viloyatdagilar bilan maslahatlashib turishi kerak. Chunki viloyat rahbarlari boshida kelgan firibgar investorlarga to‘n kiydirib, osh yediraverib, ko‘zi pishib bo‘ldi. Minerva’chilarning ham firibgarligini Farg‘onada boshidan bilib, to‘g‘ri tushuntirilgandi”, — degan.
Qodirov esa uning gaplarini tasdiqlab, “Bu gap ham to‘g‘ri, lekin bu masalada subyektiv tajriba juda muhim. Yangilar hali ham shaxsan kafolat, to‘n va oshni berishyapti”, — deya suhbatni yakunlagan.
Avvalroq investor Murali Lal Jalan Minerva City’ga yer ajratishda hokimliklar amaldagi tartibni buzgani sabab unga berilgan hudud prokuror arizasi va sud qarori bilan tortib olingani haqida gapirib, yerning olib qo‘yilishini hokim talabini bajarmagani bilan bog‘lagandi.
Shundan so‘ng holat yuzasidan Toshkent shahri hokimligi munosabat bildirgan.
Unga ko‘ra, Murali Lal Jalanning intervyusida Toshkent shahri hokimiga nisbatan aytgan gaplari huquqiy baho berilmagunga qadar davlat xizmatchisini obro‘sizlantirishga qaratilgan deb hisoblanadi.
Murali Lal Jalan gaplarining asosli yoki asossizligini tekshirish uchun va aybdorlarga nisbatan qonuniy chora ko‘rishlarini so‘rab O‘zbekiston Respublikasi Bosh prokuraturasiga murojaat qilinadi. Barcha ommaviy axborot vositalarini O‘zbekiston Respublikasi Bosh prokuraturasi tomonidan ushbu holatni qonuniy asosda o‘rganib chiqilgunga qadar asossiz ma’lumotlarni tarqatmaslikka chaqiramiz, — deyilgan xabarda.Mavzuga doir: “Sirli odam” — Murali Lal Jalanning Minerva City bo‘yicha intervyusi bahslarga sabab bo‘lmoqda. Lal Jalan aslida kim?
Izoh (0)