Фарғона вилоятида божхоначилар йирик миқдорда уяли телефонларни Ўзбекистонга ноқонуний олиб кирилишини фош этди, деб хабар беради Давлат божхона қўмитаси.
Қайд этилишича, Фарғона вилояти божхона бошқармаси вилоят ДХХ ходимлари билан ҳамкорликда Фарғона туманида тезкор тадбир ўтказган. Жараён давомида фуқаро Й.И. бошқарувидаги Mercedes-Benz юк автотранспорт воситаси тўхтатилиб, холислар иштирокида кўздан кечирилган. Натижада автотранспорт воситасининг юкхонасидаги махсус ясалган хуфиёна қисмида тегишли ҳужжатлари бўлмаган умумий қиймати 1 миллиард 13 миллион сўмлик 19 турдаги жами 484 дона уяли алоқа воситалари борлиги аниқланган.
Яна бир ҳолатда Фарғона вилояти божхона бошқармаси томонидан ўтказилган тезкор тадбирда Водил туманида Captiva автомашинаси кузатувга олинган. Кузатувга тушганини сезиб қолган ҳайдовчи зудлик билан машинадаги товарларни йўл четидаги гулзор орасига ташлаб, яширинган.
Мазкур товарлар белгиланган тартибда ва холислар иштирокида кўздан кечирилганда умумий қиймати 621 миллион сўмлик 9 турдаги 270 дона уяли алоқа воситалари эканлиги аниқланган.
Шунингдек, Наманган вилояти божхона бошқармаси ДХХ вакиллари билан ҳамкорликда Поп туманида тезкор тадбир ўтказилган. Унда фуқаро И.Б. бошқарувидаги Cobalt автомашинаси тўхтатилиб кўздан кечирилганида автомашина салонидаги синтетик қопда хорижда ишлаб чиқарилган 4 турдаги жами 138 дона уяли алоқа воситалари борлиги маълум бўлган.
Тезкор тадбир давом эттирилиб, Наманган шаҳрида фуқаро Х.М.нинг яшаш хонадони белгиланган тартибда кўздан кечирилганида бу ерда ҳам худди шу турдаги телефонлардан 17 донаси борлиги аниқланган.
Наманган вилоятида ўтказилган тезкор тадбирлар натижасида тегишли ҳужжатлари бўлмаган умумий қиймати 503 миллион 750 минг сўмлик 155 дона уяли алоқа воситалари ашёвий далил сифатида олиб қўйилган.
Юқоридаги ҳолатлар юзасидан терговга қадар текширув ҳаракатлари давом эттирилмоқда.
Изоҳ (0)