Rossiya prezidenti Vladimir Putin 25-noyabr kuni Ukrainadagi urushga safarbar qilinganlarning onalari bilan uchrashuv o‘tkazmoqda. Bu haqda “Kremlin.ru” xabar berdi.
Ma’lum qilinishicha, uchrashuv Putinning Novo-Ogaryovodagi qarorgohida bo‘lib o‘tmoqda. Kreml matbuot kotibi Dmitriy Peskov prezident va harbiy xizmatchilarning onalari o‘rtasida erkin suhbat o‘tkazilishini aytgan.
“Shuni bilishingizni istardimki, shaxsan men va butun mamlakat rahbariyati sizning dardingizga sherikmiz. Farzandidan ayrilishni hech qaysi ota-ona ko‘tara olmaydi. Rossiya hukumati halok bo‘lgan askarlarning onalari o‘zlarini unutilganday his qilmasliklari uchun qo‘lidan kelgan hamma narsani qiladi. Hech narsa yo‘qotilgan o‘g‘ilning o‘rnini bosolmaydi”, — dedi Putin.
Shuningdek, Rossiya rahbari urush maydonidagi harbiylarga shaxsan o‘zi qo‘ng‘iroq qilgani va ularning muammolari bilan qiziqqanini ta’kidlab, ularni qahramonlar deb atagan.
Noyabr oyi boshida Putin rossiyaliklar bilan uchrashib, safarbar qilinganlar haqida ularning fikrlarini eshitishga va’da bergan. Peskov keyinroq prezident fuqarolar bilan alohida tadbirda uchrashishi va bu haqda Kreml keyinroq ma’lum qilishini aytgandi.
21-sentyabr kuni Putin qisman safarbarlik e’lon qildi. 28-oktabr kuni mudofaa vaziri Sergey Shoygu uning yakunlangani haqida ma’lum qildi. Prezidentning so‘zlariga ko‘ra, noyabr oyi boshiga qadar mamlakatda 318 ming kishi, jumladan, ko‘ngillilar safarbar etilgan. Ulardan 49 ming nafari jangovar zonada bo‘lgan.
Izoh (0)