Braziliyaning Lajeadu-du-Bugre shahri meri Roberto Masiel dush Santush o‘z ish joyida otib o‘ldirildi. Bu haqda G1 portali xabar berdi.
Portal ma’lumotlariga ko‘ra, noma’lum shaxs meriya binosiga bostirib kirib, Robertoni to‘g‘ridan to‘g‘ri ish joyida otib tashlagan. Ta’kidlanishicha, jinoyatchi shahar ma’muriyatining yana bir xodimini ham yaralagan, keyinchalik u Palmeyra das Missoyns xayriya shifoxonasiga yetkazilgan. Huquq-tartibot idoralarining qayd etishicha, ayni paytda u o‘q jarohati bilan kasalxonada yotibdi.
“Ertalab (25-noyabr) Lajeado-du-Bugre shahri merining idorasiga niqobli erkak bostirib kirdi. U ikki kishini otib, mashinada qochib ketdi. Roberto Masiel voqea joyida vafot etdi”, — deya ma’lum qildi mahalliy politsiya.
Avvalroq AQSHning Virjiniya shtatidagi Walmart do‘konida ommaviy otishma yuz bergan edi, 6 kishi halok bo‘lgan, yana bir qancha odam yaralangan.
Izoh (0)