Toshkentda hokim yordamchisi va uning uch nafar sherigi 5 mln so‘m pora bilan qo‘lga tushdi

Toshkent shahrida 16-noyabr kuni tovlamachilik yo‘li bilan fuqarodan pul olgan 4 nafar shaxs qo‘lga olindi. Bu haqda “Toshkent metropoliteni” davlat unitar korxonasi xabar qildi.

Qayd etilishicha, shu kuni huquqni muhofaza qilish organlari tomonidan tezkor tadbir o‘tkazilgan. Tadbir davomida uyushgan jinoiy guruh a’zolari tovlamachilik yo‘li bilan talab qilingan 5000 dollardan 5 million so‘m pulni fuqaro X.J.dan olayotganda ushlangan.

Jinoiy guruh a’zolari:

• X.G — “Toshkent metropoliteni” DUK xodimi;
• A.R. — Zangiota tumani “Bo‘zsuv” qishlog‘ida hokim yordamchisi;
• Z.A. — vaqtincha ishsiz;
• A.B. — vaqtincha ishsiz.

Qonunbuzarlar ashyoviy dalillar bilan qo‘lga olingan.

Aybdorlarga nisbatan huquqni muhofaza qilish organlari tomonidan Jinoyat kodeksining 165-moddasi (tovlamachilik) bilan jinoyat ishi qo‘zg‘atilgan. Hozirda tergov harakatlari olib borilmoqda.