Samarqandda fuqarolarni 3 yildan buyon Isroilga ishga jo‘natishni va’da berib kelayotgan ayolga nisbatan jinoyat ishi qo‘zg‘atildi. Bu haqda Tergov departamenti xabar bermoqda.
Ma’lum qilinishicha, Samarqand tumani Gaffarov ko‘chasida yashovchi 28 yoshli M.Sh. Samarqand shahri bo‘yicha IIO FMBga ariza bilan murojaat qilgan. O‘z arizasida Samarqand shahri Sadriddin Ayniy mahallasida yashovchi 42 yoshli I.D.(ayol) uni Isroilga ishlashga yuborishini va’da qilib, 2019-yil noyabr oyidan 2021-yil yanvar oyiga qadar bo‘lib-bo‘lib, jami 14 100 dollar olgani, biroq shu kunga qadar I.D. uni Isroilga yubormasdan, pullarini qaytarib bermay, aldab kelayotgani, shu sababli unga nisbatan qonuniy chora ko‘rishni so‘ragan.
Bundan tashqari, Samarqand tumani “Qo‘shmasjid” MFYda yashovchi 36 yoshli D.U. ariza bilan murojaat qilib, unda I.D. (ayol) uni ham Isroilga ishlashga yuborishini va’da qilib, 2019-yil dekabr oyidan 2020-yil yanvar oyiga qadar bo‘lib-bo‘lib, jami 10 ming dollarni olgani, biroq shu kunga qadar uni Isroilga yubormasdan, pullarini qaytarib bermay, aldab kelayotganini aytib, shu sababli unga nisbatan qonuniy chora ko‘rishni so‘ragan.
Mazkur holatlar yuzasidan Samarqand shahri bo‘yicha IIO FMB huzuridagi tergov bo‘limi tomonidan Jinoyat kodeksning 168-moddasi 3-qismi “a”, “b” bandlari (firibgarlik) bilan jinoyat ishi qo‘zg‘atilgan. Jinoyat ishi doirasida uning kelib chiqish sabablari o‘rganilib, huquqiy baho berilishi ta’minlanadi. Hozirda tergov harakatlari olib borilmoqda.
Izoh (0)